Ito Hasian

Panusunan Simanjuntak
Administrator Administrator
Ito Hasian
IST|Pelita Batak
Boru Batak, ilustrasi

ADONG ma dua halak sahuta, goarna si Baoa dohot si Borua. Marholang bulan do parsorang ni nasida. Si Baoa di bulan sipaha sada, si Borua di bulan sipaha dua. Saalaman parmeaman do nasida, sasingkola, sagareja. Sai rap do nasida laho tu saba dung mulak singkola, ai marhombar balok do hauma nasida.

Tingki di SMP, si Baoa ma na sai mambonseng si Borua dohot lerengna laho tu singkola. Rap marsiajar do nasida di tingki borngin, di bagas ni si Borua. Suang songon i di tingki SMA.

Dung tammat sian SMA, borhat ma si Baoa manguduti singkolana tu luat na dao. Si Borua manguduti singkolana di akademi perawat na adong di huta bolon ni kabupaten.

Di borngin na parjolo dung parborhat ni si Baoa, hundul ma si Borua di karosi na somal hinundulanna tingki rap marsiajar dohot si Baoa. Marhosa ganjang ibana tingki mamereng tu karosi na somal hinundulan ni si Baoa. Dibuat ibana ma pulpen dohot bungku ari-arina. Disurathon ibana ma:

"Sian sihaetehonta rohanghu nunga sai tu ho. Alai aha ma na boi bahenonhu, ai sai ito do didok ho molo manjou ahu. Sai huapus ma andoranghi ganup tongkin huingot ho. Sai hupaima hatami alai ndang marnaro. Tung hupaminar bohinghi tingki parborhatmi manadinghon huta. Tangianghi ma sai raphon ho manang di dia pe ho"

-------

Di laonlaon ni ari. Di pamolngit ni tonga borngin. Di bagas na marbilut dua na baru tinuhorna. Dibungka si Baoa ma komputer. Digurithon ibana ma:

"Nunga jumpang tingkina ingkon marhasohotan. Nunga sai huberengi humaliang, jala hutariashon tu na dao laho mangalului di dia ibana si borua tinodo ni rohanghi. Di angka tingki si songon on jotjot huingot ho ito sidongan magodang. Ringkot rohanghu raphon ho, margait rap mengkel, martaringot rap mergek, songon sinahinan."

------------

Di laonlaon ni ari. Di pamolngit ni tonga borngin. Ditatap si Borua ma tu bulan tula, diapus andorana huhut marhosa ganjang. Di bilut podoman ni bagas ingananna dibungka ibana ma komputer. Digurithon ma:

"Nunga jumpang tingkina ingkon marhamulian. Ala ni i, tung hutangi do mansai tinggil jala huranap tung mansai jamot laho mangalului di dia ibana si baoadi sirongkap ni tondinghi. Di angka tingki si songon on sai laho do rohanghu tu ho ito sidongan magodang. Masihol ahu raphon ho, marsiberengan rap mengkel suping, male rap mangan, mauas rap minum, songon sinahinan."

-----------

Di laon-laon ni ari, di pangonjar ni roha na so boi taralosa, dibuat si Baoa ma hpna, diteleponma si Borua.

"Horas-horas do hamu ito?"

"Horas-horas do ha .....eeh .... ito."

Di tingkina, marlojong metmet ma si Borua disi diida ibana si Baoa haruar sian labuan hapal habang Silangit. Dihaol si Baoa ma ibana tung gomos, diumma di pardompahanna, huhut dihusiphon: "Ito .... hasian

Sawangan-Depok

30 Mei 2014

Komentar
Berita Terkini