HAMINJON

Administrator Administrator
HAMINJON
IST|Pelita Batak

goarhu haminjon

suansuanan na tubu ndang di godang inganan di portibi on

alai na marlas roha denggan mian

di luat halomoanki

luat Tapian Na Uli

nunga sian tingki najolo ni najolo

tu jolma tarboto

di hulinghuling ni haungku

adong gota denggan buni

gota si godang haseang di jolma manisia

dung disugi

haruar ma gota i hira na tarilu ahu

ndang madekdek madabu tu toru

alai lohot disi gabirgabir

lam leleng lam pir

sahat tu tingkina uli diluaki

nunga sian marratus taon nahinan

ahu ma sada sian marpiga ragam gota ni suansuanan

naung gabe tigatiga ni parboniaga di

banua tonga

goarhu didokkon benzoin

alai, imada hamuna

nunga leleng di taontaon na parpudi on

goarhu ndang angur be di luat hasudungan on

ala ni manang aha

ndang rongom be angka parboniaga laho manuhor gotangku

jala nasida parnampuna ahu pe

ndang girgir be mangaradoti partubungku

gariada bonangku ditabai

soada disuan pangganti

tarilu ahu manetek tu toru

haminjon do ahu

ndang huboto aha hinaseangku

na hudok tu hamu parnampuna ahu

sulingkit hamu ma dengganna ahu gabe angka aha

unang ma nian holan gabe gota tigatiga

naeng ma molo boi gabe arta naung dilompa

naung disaok

manang naung dihahua

gabe boniaga na marasam na ummarga

ringkot ni rohangku

anggiat ma nian ahu haminjon on

na mura tubu na mura suanon

di tano hasiholan on

gabe mual ni pandaraman siboan las ni roha

di nasida na marmudumudu parngoluonku

Panusunan Simanjuntak

Sawangan-Depok

18062022

Komentar
Berita Terkini