===SI TUNGKOL===
Panusunan Simanjuntak
"Silahkan Pak. Nama?", ninna si jalo tamue ni
Klinik Gigi Maratur, di Depok, tu sahalak baoa na baru masuk tu klinik.
Dipajonok si baoadi ma tu meja ni parhobas i huhut didok
goarna, alamatna dohot nomor ni hpna. "Marsahit aha ho?", ninna si
borua parhobas i huhut manurat goar, alamat dohot nomor hp ni si baoadi.
"Bah, ai halak hita do hamu?", ninna si baoadi mangalusi.
"Ala na halak hita ma umbahen na boi ahu marhata
Batak", ninna si parhobas i, sulpak.
"Marsahit aha ho, tungkolon?", ninna ibana
patorushon.
"I do", ninna si baoadi.
"Boasa tungkolon ho?" ninna si parhobas i huhut
mamereng songon na leas tu si baoadi.
"Ndang huboto", ninna si baoadi mangalusi huhut
mamastap-mastap nanget hurumna laho pademakhon pangontahi ni tungkolna.
"Ndang diboto ho? Sagari ahu huboto. Losok mangorgos
ipon do mula ni tungkol. Dibege ho do?", ninna si parhobas i.
"Pahundul ma paima dijou", ninna ibana huhut
manghilap tu halak na asing na baru masuk tu klinik.
Ndang diantoi si baoadi parhobas i tingki haruar ibana
maninggalhon klinik. Alai, holan manang piga langka dope ibana mardalan laho tu
inganan parkir ni motorna, mangkuling ma hpna paboahon na adong masuk sms.
Dijaha ibana ma aha na tarsurat di sms i: "Tungkol, on ma goarhu dohot
nomor ni hpku. Pritti,
081212221222". Ndang dibalos ibana sms i, nang pe ndang disesa.
Dung marpiga ari, adong ma muse sms sian si Pritti tu si
baoadi: "Tungkol, na sombongan ho da. Ndang hea ahu disms manang ditelepon
ho. Na burju do ahu. Poribanhu do ho. Boi do hita pajumpang?".
Dibalos si baoadi ma sms i: "Mauliate di smsmon.
Pajumpang ma hita di restoran Bahatnamasa Margo City ari Sabtu on, tonga ari.
Hupaima, Hensam".
Marpiga minit andorang so tonga ari di ari Sabtu i nunga
hundul si Hensam di restoran Bahatnamasa. Holan marpahean na somal do ibana,
marsaraoal jin, markaus na sompit di botohonna, marsolop. Ndang sadia leleng
dung salpu tonga ari mullop ma si Pritti. Mengkel suping ibana sian sihadaoan
dung pajumpang pamerengan dohot si Hensam. Mengkel suping nang si Hensam, tindang
sian hundulanna laho manomu-nomu si Pritti.
"Horas poriban", ninna si Hensam huhut manjalang
si Pritti.
"Mauliate da", ninna si Pritti huhut manjalo
jalang-jalang ni si Hensam. "Nga malum tungkolmi?".
Ndang dialusi si Hensam sungkun-sungkun ni si Pritti.
Ditogihon si Hensam ma si Pritti tu hundulan na di suhi-suhi
ni restoran. "Mentel ma ho diboan ho ahu tu restoran na arga songon on.
Manggadis saraoal do ho laho manggarar na tapangan annon?", ninna si
Pritti manungkun.
"Na godang ma hatam. Naeng mangan do ho manang
ndang", ninna si Hensam mangalusi huhut manogu tangan ni si Pritti laho
mambuat sipanganon.
"Ue, hira na manonggaki soara ni amanta on. So nanggo
nipangan dope sipanganon na tinuhorna", ninna si Pritti.
"Diboto ho do? Lomo-lomo ni baoa do tu poribanna",
ninna si Hensam huhut manonduk tu pinggan sipanganon na pinillit ni si Pritti.
"O, jadi lomo-lomom ma tu ahu?", ninna si Pritti
hira na muruk.
"Molo laho tu na denggan do", ninna si Hensam
mangalusi huhut mengkel otik.
Di sagat ni nasida marsipanganon dohot di ragat ni
panghataion nasida tusan-tuson, disungkun si Hensam ma boasa didok si Pritti
ibana poribanna.
"Ala adong amangborungku na samargo dohot ho",
ninna si Pritti. "Apala amangborum?", ninna si Hensam mangondolhon.
"Daong, paramangboruon do. Amangboru ni anggingku tubu
ni inangbaju do", ninna si Pritti.
"Daga, daga, molo songon i poriban baen-baen do hape
parporibanonta on. Molo ......".
Ndang sidung dope hata ni si Hensam nunga disurdukhon si
Pritti sungkun-sungkunna.
"Molo ho, aha do karejom?".
"Parroti", ninna si Hensam.
"Na di garobak na dionjar-onjar i do manang na
dihallung di abara huhut manggorahon: roti, roti?", ninna si Pritti huhut
dipasuman-suman panggoraon ni halak partiga-tiga roti.
"Holan na mangalesengi do hatam da. Ndang partiga-tiga
roti na medang-edang i ahu. Diida ho do toko roti indadu? Di si do ahu
markarejo", ninna si Hensam huhut manudu tu sada toko roti na balga na
tarida sian kaca ni restoran Bahatnamasa. "Nunga lima taon ahu gabe
pambahen resep ni angka roti dohot kue disi, alai ......"
"Alai aha?", ninna si Pritti dohot soara na
tarbege tarsonggot.
"Sabulan nari ndang karejo disi be ahu".
"Laho tu dia ho?", ninna si Pritti. Soarana saotik
mangkahitir na patuduhon bobonosan ni rohana.
"Tu hutanami, Sarulla".
"Marhua ho disi?"
"Marusaha. Mambahen marragam sipanganon na marbahan
lokal. Dohot ma i marragam lasiak, sambal. Lasiak rias, lasiak halas, lasiak
balinjan, lasiak gambiri, lasiak gambas, lasiak andaliman. Marhite i boi do ra
ekonomi ni parhuta nami dumenggan."
"O, lapatanna naeng manungkoli parekonomian ni
parhutami ma ho", ninna si Pritti.
"Eee....."
"Dung i suraton ni suratkabar ma: Si Tungkol manungkoli
ekonomi ni parhuta Sarulla", ninna si Pritti manguduti.
"Ndang huboto. Dia ma huboto aha na naeng suraton ni
halak", ninna si Hensam huhut manogu tangan ni si Pritti laho haruar sian
restoran i.
Ndang malua tangan sihambirang ni si Pritti sian golom-golom
ni tangan ni si Hensam di tingki mardalan nasida sahat tu inganan parkir ni
motor ni si Pritti. Nanget-nanget diosos-osos si Hensam ma abara ni poribanna i
dung denggan ibana hundul di motorna, dipangke helmna jala dipangolu motorna.
Ditailihon si Pritti do sahali tu pudi jala dihilaphon tangan sihambirangna tu
poribanna na tongtong dope jongjong di ingananna. Dipahirdop-hirdop ibana simalolongna na
tarilu.
Unduk si Hensam mangalangka laho tu toko roti inganan
parkarejoanna.
***
Marhira dua taon dungkon dipungka si Hensam usahana di
Sarulla nunga haruar jala digadis marragam sipanganon na binahen ni
parusahaanna i, i ma CV Tungkol Food Industries. Asing ni 'produk' lasiak,
adong do manang piga ragam kue dohot roti. Adong ma i na margoar lampet keju,
pohul-pohul durian, tipa-tipa gula aren, sasagun coklat, dohot na asing. Adong
ma i na dilampahi denggan dohot plastik, adong na di botol. Gombaran ni si
Hensam na maniop tangan ni si Pritti do na gabe 'logo' ni angka produk i. Di
toru ni gombaran i digurithon do pandohan: TABO
Sawangan - Depok
18 Nopember 2014
Administrator 
