SELAMAT HARI GURU! "SAMBULUNG DAFTAR HADIR DI MEJA GURU"

Administrator Administrator
SELAMAT HARI GURU! "SAMBULUNG DAFTAR HADIR DI MEJA GURU"

SELAMAT HARI GURU! "SAMBULUNG DAFTAR HADIR DI MEJA GURU"

Saut Poltak Tambunan

di sambulung ni daftar hadir di laci mejam i, guru nami

solot goarhu di holang ni mansai godang goar

ndang marimbar nian dohot angka goar na asing

songon maribu goar naung hea adong disi

marlaho-ro

ihut tu gulonceng partingkian

adong ma na manggorga bogasna

manggurit goarna di dorpi prestasi

tagan so borhat gabe darapati

manang paherbang habongna gabe lali bolon

manang holan mangggaori songon birik-birik

ai ndang hape sude boi tagamon hasea

adong do sipata na tungkap gabe jampurut

marribu anak singkola

marurat-marbona tu parsiajaran dohot kalas na sarupa

adong na martumbur gabe bunga mawar

manang lampingan na uli marbunga di parhorsikan

manang bunga mataniari na sai dirgak manatap mataniari

alai laos adong na lintun magopo ndang marboa-boa

songon samon mago so marbogas dipahiang las ni ari manogot

manadingkon ramba di alaman ni parsingkolaan

marsogot-haduaan molo dapot tingkinghu

borhat do nang ahu rap dohot nipinghu

humalaput manomu mataniari binsar

marhuta na dao

atik tutu bolas ahu habang patulangit

mardaon pogu di angka godung na timbo

manang gabe rimbus sambing

manang udan

manang holan sumillam dohot rumonggur

manang gabe soada

ingotonhu do hamu di siholhu

amang dohot inang guru nami

na palumehon sinondang panghirimon

tu ganup tio ni simalolong nami

na mangajari hami mangungkap pandiloan

na mangajari hami manatap siulubalang ari

taringot tu mangalangka ro di marlojong

taringot tu na tungkap jala bangkit mulak

taringot tu na togap mandirgak di adopan ni Mera-Puti

na mangajari hami mangudor bonang habisukon

asa martonun ulos hasangapon

manggorga bulang-bulang hajolmaon

muse di laon ni ari

molo ndang dison be ahu

pasiding saotik ingotmu di ahu

siseanmu na sai hene mardalan

tingki disuru marlojong

na sai marsidingkat ngernger

tingki disuru humalaput

ia dung sahat ahu di ujung ni dalanhu

naung gabe lali piuan manang holan amporik silopak

patulangit manang tarlalap di tano parlalapan

ra disi dope hamu

tindang di adopan ni murid di kalas

marmemehon haulion,

habasaron dohot haburjuon

Tuhan-ta ma mandongani hamu

ingot ma ahu,

igilhon goarhu di tangiangmu

asa anggiat marlapatan ahu

di Tuhan, Negara

dohot di dongan jolma.

Ia mangolu pe jolma i

Asa pangolu donganna jolma do.

SPT-November 2016

Komentar
Berita Terkini