AEK SIHADAKDANAKON
Oleh : Panusunan Simanjuntak
jongjong ahu di topimi
Aek Puli, aek sihadakdanahonhi
na sai nibolus ni amonghu, nang ompunghu
na halilu nasida nuaeng jongjong di jolonghi
hutatap tu dolokmu, tu toruanmu
huida di pudinghu halilu ni angka dakdanak na naeng ro
jongjong songon ahu muse manatap ho
soara ni parhasak ni tapianmu sian ginjang
parsaburna tu toruan
mamboan ahu tu tingki pathu na gelleng i marlojong
di topim di ingananhu saonnari jongjong
parhillong ni tapianmu tingki mangalaosi batu
pardorasna tingki mamolus inganan na marrura
pardemakna so di lubuk na lambas, na bagas
mambahen rohanghu margulasa, marhujingjang, margalunsang
di tingki ndang adong dope titi di ginjangmu
nda solu do na patariparhon angka halak sian bariba tu bariba?
nda ahu do sipata na mangalugahon solu i dohot hagogoon ni tangan sihadakdanakonhi?
dung adong titi
nda dohot do ahu manimbung sian i tu hasakmi?
tanganhi herbang tu siamun tu hambirang
pathi margellokgellok di ginjang andorang so ahu mardubur tu toru
nunga mahap ahu manatap
nunga sombu uas ni siholhu
huparbasu huparsuap ma tapianmi
laho bohalhu manguduti pangalangkanghi
molo tung on nama tingki na parpudi jongjong ahu di topimi
Aek Puli, aek sihadakdanahonhi
alai halilunghu na ingkon do marulak ro manopot ho
London
07062013