Na Ujui Tingki Dakdanak (Marbadai)

Oleh : Djalan Sihombing
Administrator Administrator
Na Ujui Tingki Dakdanak (Marbadai)
IST|Pelita Batak
Djalan Sihombing, SH

MASA do na jolo, na umbalga pabada-badahon dakdanak na ummetmet.

Digambar ma di tano (rihit) songon rupa ni jolma, didok bapa ni si Alusan do on, ninna na umbalga i.

Injak-injak ma jo bapa ni si Alusan on, ninna tu si Badua. Diinjak ma antong gambar i. Bah... diinjak-injak poang bapakmu, ninna si Ata Gana ma tu si Alusan.

Pintor marbadai ma si Alusan dohot si Badua on. Marsiranggut ma nasida, huhut ditonton si Ata Gana.

Mansai leleng nasida marsiranggut. Talu ma si Badua, ala ndang boi be manggea didondoni si Alusan. Harat pinggol na i, ninna si Ata Gana tu si Badua, asa torus marbadai nasida na dua.

Diharat si Badua ma antong pinggol na i. Dang dipalua si Badua pinggol na i, diharat pola marmudari. Sampe tangis ma si Alusan. Dung i, sae ma nasida marsiranggut.

Sabotul na monang do si Alusan marsiranggut, ala na diharat si Badua do pinggol ni si Alusan gabe mansai hansit dihilala, sae na marsiranggut i.

Dung sae marsiranggut, marbada mussung ma nasida na dua. Taralo ho abangku, ninna si Badua? Pintor hatop dialusi si Alusan, taralo abangmu do abangku si Ambolas, ninna.

Dialusi si Badua ma muse, taralo si Ambolas bapakku? ninna. Asa pintor dipilos pinggolmi, ninna mangalusi.

Ala nga sahat be tu natua-tua parbada mussung on i, didok si Alusan ma : Taralo Tuhan? Taralo abangmu Tuhan? Taralo bapakmu Tuhan?

Ndang adong be alus ni si Badua.

Gabe sahat do tu na mangasangkon Tuhan parbadaan ni dakdanak na dua i.

Songon i ma parbadaan ni dakdanak na uju i.

Ai "adong dope songon i nuaeng, manang naung dohot do angka hita natua-tua songon i?"

DJS'Bing

07/06/2022

Komentar
Berita Terkini