MANJAHA PUISI DI FERRI PORAPORA

Panusunan Simanjuntak
Administrator Administrator
MANJAHA PUISI DI FERRI PORAPORA
IST|Pelita Batak

Selasa 19 Juli 2022

Pungkul 10 manogot ni ari i nunga di ferri KM Porapora hami laho manaripari Tao Toba sian Balige tu Onan Runggu di Pulo Samosir. Ia na hudok "hami" ima ahu, inanta soripada, ianakhon dohot pahompu nami, sahalak apala laenghu dohot sahalak maen boru ni lae i. Apala ringkot ni pardalanan nami on ima mamboan pahompu nami i, na raphon amongna ro sian Inggiris, laho marnida tao i dohot huta hatubuanhu di Huta Huraba, Pahae Jae.

Disi adong tahi nami laho marferri, nunga tubu sangkap di ahu laho manjahahon puisi sibegeon ni angka pasisir ni ferri i. Ala ni i ma, ndang dao dope dung meret ferri i sian hasoanna hudapothon ma kapten ni ferri di bilut nakhoda, Amanta Samosir, laho paboahon sangkaphu. Mamintor dioloi amanta i do sangkaphi.

"Dison ma hamu hundul", ninna amanta i huhut manudu tu sada karosi. "Karosi ni kapten do on", ninna ibana.

Hundul ma ahu antong di karosi i. Hujahahon ma dua puisi. Sada ma i, jala na parjolo hujahahon, ima na marjudul Tao Dolok Mapultak, puisi taringot tu parjadi ni Tao Toba mangihuthon ilmu parbinotoan. Hudok ma mauliate dung hujahahon puisi na paduahon.

"Adong dope puisi na asing?", ninna amanta kapten i manungkun. "Adong", ningku. "Jahahon hamu ma manang piga pe taho", ninna ibana.

Las situtu ma antong rohanghu. Hujou ma pahompu nami laho mambahen gombaranhu di tingki na manjahahon puisi i. Martopak ma kapten i dohot angka donganna dung sidung ahu manjahahon sampulu nari ra puisi.

Sahalak sian nasida, na raphon angka pasisir ni ferri umbege ahu tingki na manjahahon dua puisi na parjolo, mandok tu ahu paundukunduk simanjujung do angka nasida na umbege puisi i.

On ma da tabo ni na marpuisi, boi jahahononton di ndang marimbar inganan.

Sawangan-Depok

21092022

Komentar
Berita Terkini