AMA-INA NI MARLABAB

Administrator Administrator
AMA-INA NI MARLABAB
ist|pelitabatak
Ilustrasi

AMA-INA NI MARLABAB

Oleh : Panusunan Simanjuntak

HALOBION ni sahalak sian na sahalak ma na mambahen si Amanta dohot si Inanta on gabe mardongan saripe. Sian tingki namarbaju dope nunga malo si Inanta mangalului pandaraman, ringgas mulaulaon. Ianggo taringot tu rupa dohot tompa ni pamatang, e tahe, hurang do, ningon ma. Ia si Amanta, sian tingki bajarbajar dope nunga gabe pangeran ni luat. 'Ganteng'. Mardomu muse malo marende. Alai holan na marjajo do ulaonna, marendei di angka lapo. Ianggo na niomona, e tahe, panuhor ni sigaretna pe hurang.

Tarpasupasu di gareja do na mardongan saripe on, dapotan dua dakdanak, baoa dohot borua. Si Marhutur Lalo Babbiat ma goar ni dakdanak baoa i, anak panggoaran nasida i. Dipauneune, gabe si Marlabab ma goar joujou ni dakdanak on. Jadi, gabe Amani dohot Nai Marlabab ma goar hasurungan ni amongna dohot inongna.

Nunga antar sian mulana jotjot pasual Amani dohot Nai Marlabab. Gurtik soada do na mambahen Nai Marlabab marhuteptep jala mangulakulaki pandohan “molo so adong na huomo dia boi ho mangan dohot ianakhonmi”.

Suang songon i ma nang di sada tingki. Hinorhon ni na pamosokhu ulu ni gulamo na tinutung ni Nai Marlabab gabe antar paet ma dai ni lasiak nasida tingki marsipanganon botari. Ala disungkun Amani Marlabab boasa pamosokhu, mamintor gurgur ma mudar ni dongan saripena i. Disampathon ibana inganan parbasuan jala dipandok ma angka na hata na so suman. Ndang tarbegebege Amani Marlabab aha angka na nidok ni tunggane boruna i. Haruar ma ibana sian bagasna.

“Unang pe mulakho, ndang adong gunam”, ninna Nai Marlabab.

Alai songon i ma pangalaho ni Nai Marlabab on, mura muruk, mura muse mulak rohana. Ala nunga lam botari hape Amani Marlabab ndang marna mulak, mangalangka ma ibana laho mangalului tunggane dolina i. Di sondang ni mataniari naung mansohot, diida ibana ma Amani Marlabab hundul mangunsande tu suhisuhi ni sada bagas na so diingani. Dilompit Amani Marlabab tanganna tu ginjang ni dugulna jala dipapeak ibana bohina tu tanganna i.

Dipatigor Nai Marlabab ma parjongjongna, dipahirtang ibana tanganna tu jolo huhut dijouhon, nanget: “Amangoi amang Amani Marlabab, has...has...hassim…..”, singgokan ibana.

Tarsonggot Amani Marlabab, tindang ibana sian hundulanna.

Dung sae singgokan, dipatigor Nai Marlabab ma muse parjongjongna, dipahirtang tanganna tu jolo huhut dijouhon, nanget: “Amangoi amang Amani Marlabab, hasian……”

Dipatigor Amani Marlabab tong parjongjongna, dipahirtang tanganna tu jolo huhut dijouhon, nanget: “Inangoi inang Nai Marlabab, hasian….”

Rap mangalangka ma nasida marsipajonokan, lam jonok….lam jonok…….

*

Di pudian ni ari, dung denggan sude dalan di sandok luat Tao Toba dohot bonapasogit, jala lam godang halak sileban na mebat mamereng hinauli ni inganan on, gabe parende na utusan do Amani Marlabab. Tingki marende, somalna marpahean na bontar do ibana, saroal nang kamejana. Sipatuna pe na bontar do, pinsur jala pingkal tu ginjang ujungna. Ala naung somal marsiantoan dohot halak sileban gabe ‘thank you’ nama didok ibana singkat ni pandohan mauliate tu manang ise pe.

Suang songon i, lam mardenggan do na niula ni Nai Marlabab. Sada sian na niulana ima mambahen marragam sipanganon na mamangke bahan lokal, dibungkus dohot denggan, adong merekna, jala digadis angka partigatiga di marragam toko dohot restoran. Di bungkusan ni sada sian sipanganon na binahenna digurithon do: 'The lamvet made by Nai Marlabab from the Village of Lintong'. Lampet lompalompa ni Nai Marlabab sian Huta Lintong.

Holan siidaon na somal nama molo Amani dohot Nai Marlabab mardalan manang di dia marsitiopan tangan. Jala rap markacamata na birong.

Sawangan-Depok

12102018

Komentar
Berita Terkini