Pesan Pdt Dr Robinson Butarbutar lewat WA Kepada Pendeta HKBP

Administrator Administrator
Pesan Pdt Dr Robinson Butarbutar lewat WA Kepada Pendeta HKBP
Ist
Pdt Dr Robinson Butarbutar

"Horas manogot di angka Dongan Pandita HKBP  Hinaholongan"


Di minggu na salpu  nunga taboto ise angka Bakal Pasangan Calon sipilliton ni rakyat di Pilkada taon on, 2018, di Sumut dohot di propinsi na asing, di inganan ulaonta nang di inganan na holang sian hita. Binege tgl 21 Januari 2018 do dipungka Verifikasi tu angka nasida jala tgl 12 Pebruari ma ari Penetapan Calon. Ro ma tingki kampanye terbuka dohot kampanye tertutup dung i.


Dung i sahat ma angka na marhak mamillit muse tu tingki manontuhon ise ma sian angka calon i sipilliton nasida. Sahat tu ari i, adong do ra na  mamparsirangguthon sungkun-sungkun on: Dohot do ahu mamillit, dohot ma ahu mamillit manang ndang, jala ise ma sipilliton sian angka calon i?


Ala dohot do na masa di humaliangta siparateatehononta angka pandita laho patulushon ulaon tohonanta na arga i, ra na boi do nang hita ndang so boti gabe holan pamillit passif sambing, alai gabe laos   parsidohot aktif situtu manosoi ruas  asa dohot mamillit, alai laos tarunjun dohot  manosoi ruas asa mamillit pasangan calon na sada on, ndang na sada an, songon i nang  secara terbuka pabotohon dukunganta tu pasangan calon on manang pasangan calon an. 


Siala diboto angka pasangan calon i do potensi pangunjunan na songon i na taadopi olo do ra nang nasida angka pasangan  calon i tarunjun mangalehon pangurupionnasida dohot ragam dalan tu dirinta, tu keluarganta, tu ulaonta dohot ulaon ni huria/lembaga na tauluhon/ingananta mangula, nang punguan na tauluhon laho manait rohanta/keluarganta/ruasta/na tauluhon asa mamillit nasida  di ari pamilliton  i. (Catatan: Mangihuthon undang-undang Pemilihan Umum ndang diloas sisip marrumangkon hepeng, manang politik uang. Tapajamot dirinta disi.)


Siala ni i, songon pandita ni huria na naung magodang, naung mamolus marragam pemilihan umum hita jala songon pandita na dohot mamaritahon dohot  mangulahon hatigoran (keadilan) nang dame,  didok rohangku, denggan do molo tapatujolo "panggora ni roha" songon suhat-suhat siihuthononta dohot siihuthonon ni  ruasta di na manontuhon dohot  mamillit sipillitonta/nasida. 


Huhut ma tahe tauduti di tangiang pangondianta di ariari na ro on asa tongtong di bagasan dame ngolu ni bangsonta uju jala dung Pilkada Serentak taon on, dao sian parbolatbolaton na boi manusai ngolu ni bangsonta muse, asa unang siala ni i gabe mansohot pembangunan ni bangsonta. 


Asi ma rohaNa di hita, dipasupasu ma Pilkada taon on bahen hamajuon ni bangsonta dung leleng hita tartading sian angka bangso di humaliangta, asa lam moru torop ni na pogos, asa jongjong uhum, mardamedame ngolu ni bangsonta, boi ganup mangula ulaonna mandungdung sintasinta  na dengganna be.


Tabe mardongan tangiang.

Parsameanta di Pematangsiantar, 17 Januari 2018

Komentar
Berita Terkini