Puisi : PANATAPAN TELE

Administrator Administrator
Puisi : PANATAPAN TELE
IST|Pelita Batak

PANATAPAN TELE

Panusunan Simanjuntak

sian inganan na dao

hutatap tu Panatapan Tele

sian panatapan i

tarida hinabolak

nang hinauli ni tao

jala tarbereng

adaran panuanan ni eme

sian panatapan i

sonson di simalolong

rahisrahis ni dolok

dohot dalan na margellokgellok

jala sian panatapan i

hira na boi tardungdung

apala parginjang ni Pusuk Buhit

na ninna torsatorsa

gabe inganan partuat ni si Raja Batak sian langit

sian inganan na dao

hutatap tu inganan

na humaliang ni panatapan

huida mangulahi

disi adong holan apala sada do lapo

ndang na balga

ndang na bagak

na di tingki i

ndang diharoani godang halak

huida tong sahalak baoa

dohot sahalak borua

na di topi ni dalan hundul durset paadopadop sada tandok na metmet

inganan ni mangga toba

tigatiga nasida

angka mangga

naung palamunhu huroha

naung malantuk sibukna

disampathon nasida

ndang apala dao tu rambaramba

sian inganan na dao

hutatap tu panatapan

di marpiga huta luat sileban

naung hea hunangkohi

isarana ma i di London, New York, Paris, Tokyo dohot Sydney

huida mangulahi hinabagak

dohot hinabongak

ni angka panatapan i

na diharoani godang halak

marragam bangso

sian marasing suhi ni portibi

huranap tu ari na ro

ni Panatapan Tele

suraon do ulaning tu inganan i

lam godang ro halak

marragam bangso

laho manatap angka na uli

na adong di luat nami?

Sawangan-Depok

30 Juli 2017

(Manatap do hami sian Panatapan Tele di bulan Juni 2015)

Komentar
Berita Terkini