MAULIATE OMPUNG BORU PANORONI

Administrator Administrator
MAULIATE OMPUNG BORU PANORONI
IST|Pelita Batak
Yuni Shara mengenakan pakaian berbahan ulos

MAULIATE OMPUNG BORU PANORONI

Panusunan Simanjuntak

unang ma, ompung boru,

ho marhansit ni roha

ala di tingki ni ngolum

ndang nanggo sahali pe

huumma pardompahanmu

laho mandok mauliate

nuaeng ma, ompung boru,

hupasahat hata hamauliateonhu

siala pandonganim di ompung doli nami

dung parmonding ni ompung boru na parjolo

siala pandonganim di hami pahompum

dung parmonding ni ompung doli

siala pandonganim

sahat tu parborhatmu na parpudi sian bagas na rap taingani

marulak ro, ompung boru,

huida di simalolonghu

angka na masa na gok las ni roha

na rap tadalani di parngoluonta

tingki borngin nang arian

di huta manang di balian

na tabolus di pilngas ni ari

dohot di ari udan

sada, ompung boru,

na so boi ahu lupa

ima tingki na mandurung hita

di ambar na metmet di suhi-suhi ni sabanta

ho ma, ompung boru, na mandurung

ahu ma na maniop hadangan

inganan ni dengke rongit, langkepe dohot porapora na dapotta

na tung godang

pola do boratan tanganhu manea

ala di pangarantoan

ndang dohot ahu, ompung boru, pataruhon ho tu ingananmu na parpudi

manetek ilunghu manjaha surat ni dainang

na paboahon parlahomi

jala marlobok taroktokhu

manjaha pansidungi ni surat i

na mandok: diboan ompungmu do gabe ulosna mandar na tinongosmi

jalo ma mauliate ni rohanami

tu ho ompung boru panoroni

London, UK

25 Januari 2014

Komentar
Berita Terkini