Jamita Minggu I Dung Trinitatis, 14 Juni 2020: "Pasiding ma Hamongkuson" (Lukas 12: 13-21)

Administrator Administrator
Jamita Minggu I Dung Trinitatis, 14 Juni 2020: "Pasiding ma Hamongkuson" (Lukas 12: 13-21)
Edward Tigor Siahaan
Pdt Dr Robinson Butarbutar
 Pinatolhas ni Pdt Dr Robinson Butarbutar KRP HKBP


Hamuna angka Dongan sahaporseaon di sandok Indonesia, di taon 2009 ruar do sada buku di Jerman ginurithon ni Horst W. Opaschowski, martitel,  Wohlstand neu denken. Wie die naeschte Generation leben wird (Hata Batak: Imbaru mamingkiri Hadoharon/Kemakmuran. Songon dia ma sundut na mangihut mangolu). Buku i ruar dung marnida songon dia angka bangso na mora di portibion, isara halak Jerman naung gabe bangso na mora mamungka dung porang portibi paduahon sahat tu 1989, jala dung i gabe bangso na mardohar situtu di toru ni Amerika dohot Japan sahat tu taon 2009. 


Hadoharon ni bangso i masa ndang holan ala ni disiplin dohot habisuhon ekonomi na manimpan, na so mansuasaehon naung dapot, alai ala ni parbinotoan di teknologi na mambahen nasida gabe negara industri na bahat mang-ekspor produksi nasida. Beha marnampunahon sagodanggodangna i do na manggohi sintasinta ni bangso i uju i.       


 Alai huroha dung dipamanat tarida ma na atik pe bahat diparnampunahon bangso i ndang apala digohi las ni roha hape ngolu nasida. Baliksa mansai mura do nasida tarsonggot siala marragam siala, tarlumobi molo masa angka krisis ekonomi.  Jala, ala ni hagiot marnampunahon sagodanggodangna na so marbatas hinorhon ni hamongkuson so pola beha songon dia dalanna, mangangkali dohot mardongan hajahaton petaho, na manusai dongan jolma nang dongan na tinompa na asing i. Panghorhonna boi gabe marsoali angka na marhaha maranggi siala ni arta teanteanan sian natoras dohot ompunta, martongtang na marhombar balok, sabangso nang sahuria pe tahe siala parsiguluton ekonomi, masa  marragam porang na so tigor dohot na so tigor, masa penjajahan, masa parhatobanon,  rasisme, sega angka na tinompa ni Debata di humaliangta, jala lam mohop ni portibion. 


Ala ni i, ro ma pamingkirion na imbaru diginurithon ni panurat ni buku i na mandok, "Dumenggan do mangolu na denggan sian na marnampunahon na godang" (German: Gut leben statt viel haben). Isarana, ndang ingkon manggohi ngolu on na mangula marjomjom, alai beha asa boi lumeleng mangolu sahat tu na tumua, boi mangulon, manghasonangkon naung adong diiba, manarihon angka dongan jolma, na mangurupi dongan na hurangan di ngolu on, dohot mangorui torop ni jolma.  Di tingki na dos dijouhon angka huria ruas ni Dewan Gereja Sedunia ma mamungka di bona ni taon 2010-an, asa sude halak Kristen manguba pamingkirionna, i ma ndang be na patujolohon ngolu na marnampunahon sagodanggodangna, manang dia pe dalanna, alai marngolu na mangolu denggan, ngolu na tuk, na ugahari, i ma na marnampunahon na godang di adopan ni Debata marhite naung tagoari nangkin. 


I do sinoarahon ni Tuhanta Jesus tu hita sadarion marhite hataNa di Lukas 12: 13-21, asa patupa na dos di ngolunta nuaeng, i ma: Ndang be na martujuan marnampunahon dohot papungu arta sagodanggodangna  na so marbatas (Gorik: huparchontos) marhite hamongkuson (Gorik: pleoneksias ayat 15, 21), ai ndang disi impola ni ngolu. Koras do Tuhanta paingothon hita marhite umpama taringot tu ngolu ni sahalak partano na bidang na tompu marujung dibahen ni Debata, ala pola dipaposhon ibana ngoluna (daging, roha nang  tondina) tu arta na mansai godang naung pinapunguna i, na rap dohot ibana dung mate. Tangi ma hita na tumua, na umposo , naposo, remaja nang dakdanak di hataNa i. 


Naung sanga mangolu di bagasan hamongkuson, muba ma; na tongon tarunjun patupa i, pasiding ma i; na tongon marnida tu jolo, asa mamonai pasidingkon. Tauji, tabonai, jala hota ma hita manghangoluhon ngolu na mamora di a dopan ni Debata. Tarbahen hita do i mardongan TondiNa, ala dung ditobus Tuhanta i hita ndang be angka jolma na robi na mongkus hita (Rom 1: 29; 2 Korint 9:5) alai jolma na imbaru do hita (Mat 10: 15, Rom 12: 1, 1 Tes 2: 5, Kol 3: 5, Ep  4: 19, 5: 3, 2 Petrus 2: 3, 14).  Amen.  


Komentar
Berita Terkini