Jamita Evangelium di Minggu Trinitatis, 7 Juni 2020: "Hamuliaon ni Jahowa di Angka na TinompaNa" (1 Musa 1: 26-31)

Administrator Administrator
Jamita Evangelium di Minggu Trinitatis, 7 Juni 2020: "Hamuliaon ni Jahowa di Angka na TinompaNa" (1 Musa 1: 26-31)
Edward Tigor Siahaan
Pdt Dr Robinson Butarbutar
 Oleh: Pdt Dr Robinson Butarbutar, KRP-HKBP


Hamu angka Dongan sahaporseaon hinaholongan di sandok Indonesia, laho paingothon, mangajarajari, pabagashon, patoguhon dohot paimbaruhon haporseaonta di hadirion dohot ulaon ni Debata Sitolusada i, diparade do di taon parhuriaonta sada minggu Trinitatis jala 23 minggu dung Trinitatis. Di minggu Trinitatis sadarion, ndang holan manghamauliatehon ulaon ni Debata na manompa hita dohot nasa na tinompaNa i tinuju ni jamita, atik pe mansai ringkot do i.    Alai manogihon hita manghamauliatehon hataridaan ni hamuliaon ni Debata di angka na tinompaNa i do.  Boasa ringkot i? Ala, songon na taboto, lam tamba ari lam maol taida hamuliaon ni Debata disi, ai nunga lam tasegai na tinompaNa i, jala panghorhonna jotjot ro sian na tinompaNa i mara tu ngolunta.  


Marhite tangiangta boi do hita marnida hamuliaon ni Debata. Alai boi do tong taida hamuliaonNa di angka na tinompaNa i di humaliangta di hasiangan on. Isarana, molo taida haulion ni Tao Toba na tarbarita i, ndang adong ra hita na so tuk marnida hamuliaon ni Debata na manompasa. Alai molo taida na adong di humaliang ni Tao i naung sanga sega, isara aekna naung so tarinum be, dohot angka hau di humaliangna na so marragam be, alai holan sada nama, Eukaliptus, ndang tarbahen hita be marnida hamuliaon ni Debata disi.  Ala ni i di jamitanta sadarion, dienet sada barita nauli ndang holan taringot tu Debata na manompa jolma, baoa dohot boruboru tumiru rupaNa, dohot na mamasumasu jolma i. 


Alai dohot do taringot tu Debata na mangalehon turgas tu nasida mangarajai na tinompaNa na asing i (1 Musa 1: 26-31), dung jolo sidung ditompa Ibana nasa na adong (1 Musa 1: 1-25). Jala, atik pe turgas pinasahatNa i parjolo manarihon na ringkot tu jolma i, i ma marpinompari, alai ihut tusi dohot do turgas i pasahat tu jolma i ulaon manggohi sandok tanoon. Turgas nasida disi i ma mangarajai angka dengke di laut, pidong na martongatonga langit, nang sude binatang angka na manjirir di atas dohot marhosa di bagasan tanoon, suansuanan dohot bulungna. Hata 'mangarajai' dison ndang laho patundukhonsa tu na so hinalomohon ni Debata, i ma manusai angka na nirajaan i jala panghorhonna manusai ngolu ni jolma i sandiri.  Alai laho patupa na denggan tu nasida do. Ia so i, ndang na adong di ayat 31 i pandohan na mandok na dung ditilik Debata sude na tinompaNa 'denggan situtu do sude na tinompaNa i.' 


Asa, ala di angka na tinompaNa i do tong tarbahen hita marnida hamuliaon ni Debata, tapasangap ma Debata marhite na mangulahon turgasta maradophon angka na tinompaNa i, i ma mangarajaisa, asa tongtong denggan situtu angka na tinompaNa i songon na diida di Debata di tingki dung manompasa, ndang baliksa asa sega, ai sian angka i do hita mangolu dohot marhahipason (ayat 30). Ampit do i di tingkinta nuaeng, di na ingkon mangolu hita dope rap dohot Covid 19 i. Ai, mangihuthon angka peneliti Virulologi di Jerman di minggu na salpu,dung di toru ni Curva 1 RO hararat ni virus i disi, tamba ni na "ingkon marmasker, marjarak fisik sosial 1 tu 2 meter, dohot marhaiason," sadanari na boi mangotapi hasasahat ni Covid 19 tu jolma i, i ma molo jotjot jolma i  pajonokhon dirina tu angka suansuanan na metmet nang na balga di duru ni jabu/godung na tartutup. Na ringkot tu Vaksin alo ni Covid 19 i pe dapot hita do sian angka na tinompa ni Debata i. 


Ala ni i, unang ma tauduti be patupa na so denggan tu angka na adong di humaliangta, asa tarpasari hita na ringkot di ngolu dohot hahipasonta. Jala, ala di angka i do tarbahen hita marnida hamuliaon ni Debata,  ingkon tabodo do angka dongan unang tapatupa dosa maradophon Tuhanta marhite na manegai angka na tinompaNai. Ala ni i, sihalashononta do sangkap ni Pamarentanta pajongjong Ibu Kota Negara Indonesia naimbaru di Kalimantan Timur opat taon na ro on, i ma Ibu Kota na rata, na maraleale dohot angka na tinompaNa i, dohot na taarop boi mamboan hamajuon tu sude hita di sandok Indonesia. Na mambahen Indonesia tarbarita. Asi ma rohaNa dipatau hita ganup ruas ni huria mangargahon hamuliaon ni Debata di angka na tinompaNa, asa tongtong rade na ringkot tu ngolu dohot hahisaronta marsundutsundut.  Amen. 


Tangiang

Hupuji hami goarMi ale Debata Sitolusada di parmingguonnami sadari on di Minggu Trinitatis. Tarlumobi hupuji hami goarMi ala marhite hataMi naung hubege hami lam tandi di hami na ingkon ulahononnami ma lam marsitutu turgas pinasahatMi tu hami angka anak dohot boruM naung pinaluaM dohot naung pinaimbaruMi hajolmaonnami, sian jolma na robi gabe jolma naimbaru, patupa turgas pinasahatMi tu hami, i ma mangarajai angka na tinompaMi sadenggandengganna, ai di angka i do hamuliaonMu. Mardosa do hami maradophon hamuliaonMi molo pilit huulahon hami turgas pinasahatMi tu hami: Ndang hupauliuli hami na angka na tinompaMi, baliksa husegai hami.


Ala ni i, ale Tuhan, loas ma hami pasangaphon Ho di ariari na ro on marhite na manjagahon haulion ni angka na tinompaMi. Sesai ma dosanami saleleng on, di na sai huarsahi hami rohaM marhite ulaonnami na manegai na  tinompaMi laho manggohi angka hagiot parsatongkinannami i. Pargogoi ma hami nang pamarentanami asa sude hami marsitutu mangulahon ulaonnami mangarajai saurdot tu lomoM angka na tinompaMi, asa boi di ngolunami di tingki on dohot di ngolu ni angka pinomparnami marsundutsundut hudai hami hinadenggan ni ngolungolu nang hahisaronnami ala denggan hurajai hami angka na tinompaMi di ngolu  nang ulaonnami. Urupi ma sandok bangso  di portibion, pamarentana, angka pengusahana nang sude rakyat songon i nang ruas ni huriaM marsitutu patupa na denggan tu angka na tinompaMi, asa unang lam marmatean angka na tinompaMi pola sampe tu agoan haadonganna, alai asa ganup marsonangsonang. Hupasahat hami tangiangnami on di bagasan Jesus Kristus Tuhannami. Amen.


Komentar
Berita Terkini