Jamita Evangelium Minggu Rogate, 17 Mei 2020: "Tangiang Hamauliateon" (1 Kronika 17: 16-27)

Administrator Administrator
Jamita Evangelium Minggu Rogate, 17 Mei 2020: "Tangiang Hamauliateon" (1 Kronika 17: 16-27)
Edward Tigor Siahaan
Pdt Robinson Butarbutar
Pinatolhas ni Pdt Dr. Robinson Butarbutar


Hamuna angka dongan sahaporseaon di sandok Indonesia. Sintong do ra pandohan na mangihut on  taringot tu partangiangon ni naporsea di Debata parpudi on naung marasing sian na hinasiholan ni Debata, ima: "Jumotjotan jala gumodangan do isi ni tangiangta patujolohon pangidoanta. Molo tung tadok mauliate, di bona jala jempek do. Sadarion, minggu Rogate, marhite 1 Kronika 17: 16-27 ditogihon do hita asa mangalehon roha tu tangiang hamauliateon. Pinomat dos nian tingki tu duansa tapatupa."


Tangiang hamauliateon do na dipatujolo raja Daud  di tangiangna tu Debata di undungundung, dung sahat ton ani Debata marhite panurirang Natan tu sipareonna, i ma: Naung didai pandonganion ni Debata di ngoluna nang pe sai dihaliangi musuna ibana, basabasa ni Debata tu bangsoNa, ai dilehon tu nasida sada inganan na manongtong bahen inganannasida nang panghamonangkonon ni Debata tu nasida marolohon musunasida  (Ida 1 Kronika 17: 3-10, 16). Ala ni i, di tangiang hamauliateonna i, di na digoari ibana dia naung dipatupa Debata di ngoluna, sai diondolhon si David do na mangihut on: "Sudena i dipatupa Debata ndada  ala ni habetengon manang hamuliaonna ni si David (ayat 16-19), alai ala ni habalgaon ni Debata i sambing do, na so tarpatudos tu manang ise." Debata do naung manobus bangso niainNa i. Jala adong do hape sangkap ni Debata patupa i tu nasida, i ma: "Laho patudu goarNa na tarbarita i tu angka bangso di sandok portibion, marhite halongangan bolon dohot na songkal" (ay 20-22) pinatupaNa tu bangso ni rajaan ni si David i maralohon angka musnasida. On ma panandaionna na mansai bagas. Tutu, dipatupa Debata halongangan bolon tu nasida. Alai hamuliaon ni goarNa do na tong tinujuNa. Ndang jadi bangso i marginjang di roha. Ingkon Debata do na marmulia. 


Tangiang pangidoan ni si David dung i, jumempek, mangido asa dipahot jala sintong dipatupa Debata na binagabagahonNa tu raja i, i ma: "Ndang holan na paadongon ni Debata ma sada sian ianakkonna laho   pajongjojong bagas joroNa, alai pahoton ni Debata ma nang harajaon nirajaan ni anakna i ro di saleleng ni lelengna. Jala, pahotonNa ma tong bangso i gabe bangsoNa" (Ida 1 Kronika 17: 11-14, 23-27).


Boasa ma, angka dongan, ingkon dipangido Debata hita asa mangarimangi  tangiang hamauliateonta tu Debata saleleng on dohot tu jolo on, tarlumobi di na mangadopi pandemic 19 on? Suraon do ala nunga tung losok rohanta manghamauliatehon angka na binahen ni Debata di ngolunta saleleng on,marsasahalak, saripe, sahuria, sabangso, gabe sanga hita agoan hiras ni roha mulaulaon? Suraon do ala, ndang tahamauliatehon dope na nunga tibu mangula Debata palua hita sian Virus on, singkop di tingkina, asa lam marmulia goarNa, tung pe marungkil do namarsahit dohot namatean siala Covid 19? Ai aut so i, ndang  tibu ra taboto harararat ni pandemi on, dia angka sipatupaonta unang apala pabahathu na terinfeksi dohot agoan hosa sian tongatonganta, sanga adong na menet jala lemba rohana mida virus on, sanga masa hagunturon ala sala mamutushon pamarentanta. 


Aut so i, ndang tarbahen bangsoonta ra mambahen ndang sahat pandemi on tu angka bagas nang hutanta songon di Italia, Spanyol, Ingris, USA, dna, ndang sanga ra pamarenta parade angka na ringkot manjaga dirinta nang pangubati, mamareso  na terinfeksi nang patupa isolasi, karantina, pangubation; ndang martamba ra na malum; ndang sanga ra tahudus manjagahon Jarak Fisik Sosial, marhaiason, marmasker, ndang marsaori, marminggu di jabu. Ndang sanga ra pamarentanta patupa na mansai ringkot isara Perpu keuangan, Permenkes nang Inpres unang jolo mudik, paeret Dana Desa gabe Dana Bansos; ndang mangolu muse tondi masiurupan, mangurupi angka na hurangan di hita. Bahatnari dope tahe sigoaronta dison di tangiang hamauliateonta domu tu usahanta manaluhon Covid 19 on, dohot domu tu na asing di ngolunta. Tagoari ma i. Dung i pe tapangido asa dipahot Debata holongNa nang bagabagaNa tu portibion, angka bangso, bangsonta, nang  tu hita ganup ruas ni huriaNa. Amen.


Komentar
Berita Terkini