Didia Batak I?

Oleh : Adol Frian Rumaijuk,STP,MMA
Administrator Administrator
Didia Batak I?
IST|Pelita Batak
Adol Frian Rumaijuk

SAHAT tu sadari on, tuk godang do ra sungkun-sungkun di roha ta be. Dia do? Songon dia rumang ni Batak i? Alai molo tung pe holan panurat on na manghilala, sai anggiat ma tu joloan ni ari lam godang hita na mangharingkothon majalahi jala mandiori hasittongan taringot tu habatahon i. Disima Batak Namartutur, Batak Namaradat, Batak Namarugamo lan naasing pe.

Manghilala do hita, di na masa nuaeng, tung godang perubahan namasa di tano on. Parbinotoan ni angka jolma pe lam tamba, jala nungnga godang masuk angka adat manang budaya naasing tu tonga-tonga ni halak Batak. Anung pe secara sahalak/pribadi, songon i nang di tonga-tonga ni angka parpunguan.

Perkembangan ni zaman dang boi disoadahon, ala lam tamba ari tamba ma angka namasa. Songoni nang di angka ruhut ni parngoluon ni hita halak Batak, na tontong parsidohot di proses ni perubahan ni angka zaman.

Alai, hita di naumposo di Bangso Batak, boha tutu, nunga tasigat tu bagasan rohatta be? Didia do nuaeng angka poda dohot uhum taringot tu ruhut-ruhut ni parngoluon siadapari naung denggan mangatur jala paune-une partordingni angka ulaon siganup ari di tonga-tonga ni bangso nabolon i.

Boasa ma di pudian ni ari, godang angka namasa, na songon na pasiding jala pabalik namasa sian nasasintongna di parngoluon ni bangso i? Angka uhum paradaton, tutur, nang songoni naasing, tuk do talupahon di bagasan pardalanan ni bangso i di tano on.

Ndang be taingot angka tona ni natua-tua naparjolo. Hape didok do 'Pantun Hangoluan, Tois Hamatean'. Dang pola hulapatani i, pasti do hita antusi lapatan ni hata i. Didia do hita didok pantun, molo tona ni angka natua-tuai talupahon? Dang taboto be tuturta napaboa halak Batak hita, dang taboto songon dia parhundulta diparadaton, dang taboto songon dia maradophon angka natoras.

Alai nang pe songon i, di hita bangso nabolon jala natarpillit. Nunga tahilala, sahat tu tingki on, molo tongtong hita manimbil sian poda ni angka natua-tua sijolo-jolo tubu, tarlumobi namartona asa tongtong hita marsada lao mangalo angka naro nanaeng manegai hasadaon di tonga-tonga ta.

Di tingki na parpudi, nunga godang angka donganta na gabe tokoh di tingkat nasional nang songoni angka luat nalobi bidang dope sandok portibion. Nasida nunga mansoarahon asa gabe marasada hita, asa adong hagogoon lao mambuat harajaon nang angka hasangapon marhite-hite angka hagabeon naung tajalo di ari naparpudi on. Alai nunga ro didia panjaloonta di suara nasida?

Beta dongan, beta hita pasada roha ta, asa boi hita rap udur tu dolok tu toruan mangalugahon habatahon i. Tarlumobi ma lao mambahen dalan di angka pinomparta tu ari namangihut. Unang sai marsombu-sombu be hita, nunga lam matua tano on.

Nuaeng, adong piga-piga organisasi hasadaon nadipatupa ni angka dongan. Nauli ma i, alai dumenggan dope nian molo on tapatupa laho patudu hasadaonta di ari on nang songoni tu ari marsogot. Dang holan naeng patudu gogo ni tambihul ni sasahalak, alai naeng ma nian hita patudu gogo ta ala rap hita marluga.

Marsada ma hita, asa lam balga bangso batak nabolon i. Horas

Redaksi

Medan, 13 November 2020

Komentar
Berita Terkini