Jamita Evangelium Minggu IV Dung Trinitatis, 5 Juli 2020: "Dipasupasu asa gabe Pasupasu" (1 Musa 12: 1-9)

Administrator Administrator
 Jamita Evangelium Minggu IV Dung Trinitatis, 5 Juli 2020: "Dipasupasu asa gabe Pasupasu" (1 Musa 12: 1-9)
ist
Pdt Dr Robinson Butarbutar
Pinatolhas ni Pdt Dr. R. Butarbutar, KRP HKBP


Hamu angka dongan  sahaporseaon di sandok Indonesia,


Di tongatonga ni hajolmaon sian na robi sahat tu tingkion, adong dua bangko na masialoan. Na  sada maralo, alai na sadanari saurdot tu lomo ni roha ni Debata. Dia ma i? I ma: Nasada, hagiot na holan mamingkirhon na ringkot tu diri, saripe, masyarakat, bangso, negaraniba dohot tu jolma i sandiri.   Nasadanari i ma hagiot ndang holan mamingkirhon diriniba, saripeniba, bangsoniba, negaraniba sandiri, nang holan jolma i sandiri, alai ingkon dohot do patupa na denggan tu na asing. Ala ni i do didok apostel Paulus: "Unang ma holan na ringkot di hamu matahon hamu, dohot ma nang na di dongan" (Fil 2:4). Saurdot do tu na paduahon i prinsip 'saling ketergantungan,' ai jorbut do rumang ni na manarihon holan diriniba sandiri, alai ndang adong na ummuli jala  na sdumenggan sian ngolu na masisarian dohot masiurupan. 


Boi do taida di bagasan opat taon ne parpudi on bangko na parjolo i dipatuduhon Presiden D. Trump, marhite pandohan, 'Beta tabahen Amerika balga muse'.  Di pudi ni pandohan i holan kepentingan ni Amerika do sipatujolohononna. I do sibonsirina, isarana, boasa pulut rohana ruar sian  Kesepakatan Kiyoto na pinatupa ni angka bangso laho mangorui mohop ni portibion, jala ruar sian WHO PBB na tongon mangalo Covid 19. Andorang so ibana, alo ni i do disoarahon dohot dieahi Presiden Barack Obama, na patujolohon kepentingan bersama ni sude rakyat Amerika nang kepentingan ni sude angka bangso di portibion. Las rohanta, ala na dos do sinoarahon ni Presidenta Jokowi di angka pidatona di jolo ni angka uluan ni angka negara andorang so jala dung ro pandemi Covid 19.


Visi manang pamerengon tu jolo na dos tu hagiot na paduahon i do pinatolhas ni Debata tu si Abram, Ama ni marragam bangso di pardagingon nang di haporseaon, di 1 Musa 12: 1-9 i, i ma na mangihut on: 'Dipasupasu Debata pe si Abram dohot angka pinomparna sian na jolo sahat tu tingki on ndang holan asa tu dirinasida sandiri sambing pasupasu i, alai asa tarpasupasu do nang angka bangso na asing di portibion marhite nasida."   Marasing sian na somal, mansai uli visi ni Debata i. Pahiras roha. Ala ni i do umbahen na, dung umbegesa,ndang so paima haroro ni pasupasu i, alai migor patupa angka na mangihut on do diula si Abram pasauthon pasupasu i, i ma: 'Bungkas dirina, dongan saripena, anak ni hahana dohot sinamotna sian Haran jala mangaliati tano Kanaan sahat tu Sikem. Jala, atik pe nunga dibagabagahon Debata tano Kanaan i lehononNa tu pinomparna, ndang so ibana disi, alai borhat dompak habinsaran di Betel, pajongjong undung-undung, pauli langgatan pamujion di Jahowa, jala dung i bungkas muse dompak dangsina.'  


Di pardalanan ni angka bangso, ndang marimbar angka pinompar ni si Abram, di pardagingon dohot di haporseaon, jotjot do dihalupahon visi na uli di Debata i. Tarida do i di sejarah pardalanan ni bangso Israel dohot angka bangso Arab na sai martongtang, pola sahat tu naeng patupa genocide, na sada naeng mangagohon nasadanari. Angka ruas ni huria ni Kristus pe hea do holan mamingkiri dirina sandiri. Ala ni i sihalashononta do haputusan ni Sinode Godang HKBP di taon 2014 na manangkapi  visi naimbaru sidungdungon sahat tu taon 2064, i ma 'Gabe pasupasu tu portibion on.'  Hiras, bisuk, jala marsitutu ma hita patupa i di pardalanan ni ngolunta marsadasada nang marsasahuria, tarlumobi di tingki on di na ingkon taadopi ma pertumbuhan minus 6-7.6 ekonomi ni portibion siala ni pandemic Covid 19 i. Donganan ni Debata naung mamasumasu hita i do hita gabe pasupasu tu humalingta di ariari na ro on.  Amen.

Komentar
Berita Terkini