Nunga jumpang muse ARI PESTA i

Oleh : Sampe L. Purba
Administrator Administrator
Nunga jumpang muse ARI PESTA i
Ist
Sampe L Purba
Na jolo - Tolu do ari besar na sangat berkesan di huta nami na merupakan people festivy and carnaval. Ima parjolo - ari kemerdekaan di bulan Ualu. Ulang taon do didok ari kemerdekaan 17 Agustus. Ndang pola somal ari hatutubu ni jolma dirayakan. Alai ianggo ari hatutubu ni Negara on pesta bolon penuh kemeriahan doi se kecamatan. [ Laos ondo na mambahen hondo roha di ari na parpudion, di na sebagian kalangan manganggap dang dos hak rap partohap di kemerdekaan i ]. Na paduahon ima ari Natal. Ari Pesta do digoar ari Natal on. Napatoluhon ima Taon Baru, na marjarak saminggu sian Ari Pesta.

 

Ala masyarakat agraris, paradat jala parugamo na relatif homogen do di hutanami, jadi hampir dos do irama gerak dohot siklus masyarakat sepanjang taon, di natolu peristiwa pesta rakyat i.Fokus ma jolo nuaeng, cerita tu Ari Pesta.

 

Di bona ni bulan Desember, nunga manjalo sipajojoron hami sian Vorhanger/ Guru Huria manang Sintua. Ima ayat hapalan sipajojoron annon di Ari Pesta. Adong mai ayat na jempek. … di mula ni mulana ditompa Debata langit dohot tanoon. Biasana tu akka dakdanak na marumur 4 - 8 taon ma on. Alai adong na dapotan ayat na ganjang molo tarumbijak jala nunga markalas tolu tu ginjang na manjalo. … dungi ro ma ujui parenta sian Kesar Augustus asa disurati ganup tu bona ni pinasana. Borhat ma nang si Josep ...dst. 

 

Holan bindu ayati do disagihon/ dibagihon di harotas na metmet. Biasana sai adong do sintua manang guru na adong Bibelna di sada huta. Jadi ro ma iba tu jabu nasida mangido tolong asa disalin ayat i tu harotas laho siapil apilon. Hape sipata olo do dang lengkap bibelna. Holan Perjanjian Baru - na ginoar testamen. Jadi molo kebetulan sian Perjanjian Lama do sipajojoron, ingkon laho ma iba tu huta ni Tulang ala adong Sintua na matua parbibel na hapal di si. Di surat Tulang i ma antong di harotas bage ...Hehe ma ho marsinondang ma ho ai na ro do panondangmu.. dst. Ndang pegawai Tulang on, alai bagak suratna. Ai sanga antong nasida H.I.S di tikki Boladda.

 

Setiap pertengahan minggu, biasana ari Rebo sibotari laho do hami latihan tu gareja. Marjarak tar 1 - 2 km sian huta. Manguji uji mai didok goarna. Rehersal. Las do roha na manguji ujion. Ai gabe alasan do on tumibu mulak sian hauma. Musim marsuan eme do di bulan Desember. Ngali, gogo alogo jala ari parudan/ musim hujan doi. 

 

Di tanggal 24 i, masa ma marbinda. Papungu julo-julo/ semacam arisan bulanan do akka natua tua di awal tahun laho tu binda si sahali sataon. Paima dapot bulan Desember diputar do hepeng i di antara anggota dengan bunga rendah. (Setingkat risk free rate Treasury Bond sinuaeng). Sai adong do antong na manginjam. Misalna ala adong ulaon mendadak na porlu hepeng, marujung ngolu ni natua tua rupanii. Manang tu tambahan modal molo adong do parekonomi kecil kecilan tarsongon pedagang pengumpul panen tanaman kol.

 

Pinahan lobu do biasana jagal binda. Ima pinahan tunggal kasing (na dikebiri sejak kecil). Alai adong do na marjulo julo umbalga. Boi ma hepengna tuk gabe mamotong hoda. Sian parkongsi julo juloi pe nunga tergambar sasintongna tingkat perekonomian ni sada keluarga. Molo antar parhauma na bidang, amantai Tukang, guru manang inantai bidan, didohoti nasida do markongsi dua julo julo - hoda dohot pinahan lobu. Alai molo singgit maol do ekonomina, ba julo julo pinahan lobu ma diihuthon. Ipe olo do sipata holan satonga bagian. Terutama mai angka ina na sopot mabalu.

 

Ianggo hami akka dakdanak sangat egaliter do. Ndang mardua imbar na pogos tu paradongan. Di manogot tanggal 24 Desember i, nunga rame rame hami marsiboan panci, hajut dohot mangkuk (inganan ni bontar/ mudarna - ai jarang dope palastik) tu parbindaan i. Alai adong do na mamboan hotang. Dirusuk ma jagal i , songon na ditengahon mamboan mulak tu jabuna. Sabar do iba antong manonduri akka ama na manaltali dohot manimbang jagal i. sai adong do sipata mandoltuhi pancina songon taganing mendesak asa tumibu dibagi. Ai nunga ro ijur male. Goarna ma dakdanak.

 

Ndang di sude parbindaan adong kilo. Jadi jolo diturpuki do jagal i, misalna 50 turpuk. Manaksir boratna, dibuat ma songon timbangan neraca. Di ujung sebelah disangkothon do holi holi songon sidokdohina, jala di ujung na sadaan, adong ma wadah tandok na metmet. Diisi ma jagal, sahat tu na rata neraca i. Relatif boi do antong dos turpukan i. Sian on do ra mula ni hata pardasing na so meleng, parhatian pamonaran. Adil.1

 

Binoan ma jagal on tu jabu, dilompa toluhon mardongan sorbuk, bawang toba dohot kantang. Asa gumodang molo dibagi. Mangallang jagal siarian, songon i nang annon sibotari. Mantap. Jarang do antong boi mangallang jagal dua hali iba di bagasan sadari. Tanda do Ari Pesta on tutu.

Tumibu do mangan sibotari. Ai marsipajojoron ma bodari di gareja. 

Tangiang mangan onpe nunga gumanjang dibahen Amanta. ..sai parbisuhi anakhonnami di na naeng pajojorhon sian hataM nabadiai … Amen. 

 

Momos do ditonai natua tuai asa jojor unang sala/ pipot annon di gareja. Ai olo do sipata nang pe naung hapal, hape dung di jolo ni natorop gabe songon na lupa/ pipot logam logamon na pajojorhoni. Siuruon ehet eheton do dakdanak na pipot sahat tu musim marsipajojoron taon na ro.

Marbaju naimbaru do umumna hami antong. Sahali sataon do baju dituhor. Antar longgar doi, asa boi pakkeon pinomat sataon, ai masa pertumbuhan dope pamatang. Pakkeon ma baju baruon awal tahun depan, di na naek kalas. Di bulan Januari do awal taon ajaran baru, jala ndang masa dope pahean seragam.

 

Ndada holan dakdanak na marlas ni roha di Ari Pesta. Dohot do natua tua tarlumobi akka naposo. Dung ari pesta umum, marsogotnai tanggal 26, ginoar maon Pesta Paduahon. Biasana adong do parpunguan sabungan ni huria pagaran di gereja bolon/ resort. Festival koor do on.. antar huria. Mannen nang Naposo bulung. Marseragam do akka Parende. Nabontar alai marhapi hapi di rukkungna. Mirip tu jubah ni hakim manang songon potongan baju gaun ni si rijik (naburiapusi). 

 

Ndada holan parkoor na ro tu huria bolon. Sude akka naposo do. Gok rame di dalan huli songon na pawai. Manggaya testes do marsuri doli doli, potongan rambut berjambul. Lengkap dengan miak rambut tancho na hapal. Nunga dipelihara hian potongan ni pakkasannai untuk penampilan di ari pesta. Di dalan nang di gareja sambil do nasida marsiserbengan atik adong akka anak boru na di solo mata ni sidoli. Na boi mai berlanjut pajumpa di onan ari Jumat on laos ditambor nunuti di partandangan.

 

Toho ma tutu ari natal i, ari pesta. Ai tung sude do marlas ni roha. Sinepnep uruk uruk silanlan aek toba, na metmet ndang marungut ungut, na magodang pe marlas ni roha.

 

Nunga jumpang muse ARI PESTAI

Hatutubu ni Tuhanta Jesus i

Tuat do Ibana sian surgo i

Mebat tu hita on

Hasangapon di Debata 

Dame dame ma di jolma

Lomo ni roha ni Debata

Hajolmaon muse

 

Puncak, 25 Desember 2016.(Sampe L Purba)

 

Komentar
Berita Terkini