Pinatolhasni Ephorus Pdt. Dr. Robinson Butarbutar
Hamu angka dongan na hinaholongan,
I. Tung mansai bagas do dipaandar naporsea dohot punguan ni naporsea/bangso ni Debata ojahan mamujimuji Debata ro di saleleng ni lelengna, di tingki na une dohot di tingki na so une, jala marojahan tusi togu do pos ni rohana/nta tu Debata pangurupina/nta.
Siala ni hatoguon ni ojahan i ma umbahen ndang olo naporsea i marsigantung tu jolma tung pe marharajaon jolma i, ai ndang manongtong hadirion ni jolma i. Ojahan na mansai togu i taringot tu hadirion dohot ulaon ni Debata i ma na dipaandar naporsea i di Psalmen 146: 3-10.
I ma :
1. Debata Panompa,
2. Debata Siparmudumudu Ngolungolu,
3. Debata Paruhum natigor,
4. Debata na Sipalua na tartaban/taruhot,
5. Debata na mangondihon dohot manarihon angka napogos dohot na marhatauon na marasing/kaum
Difabel (na mapitung, na so boi mardalan, dohot lan na asing).
Mangihuthon naporsea i, ia na martua i ma na marhaposan tu Debata na songon i hadirion dohot ulaonNa. I do na niida dohot pinanghilalahon ni naporsea i di ngoluna, mamungka dung dapot rohana/haporseaonna hadirion ni Debata na songon i di ngoluna. Siala ni i do tarbahen ibana mamujimuji Debata manongtong di bagasan ngoluna.
II. Alai hamu angka dongan, ndang sude boi manghatindangkon i di ngoluna. Ndang di sude partingkian boi togu situtu pamujion na songon i. Gariada sian tingki tu tingki, jala sian sada inganan tu inganan na asing diuji angka na masa di portibion do pos ni roha ni naporsea i tu Debata na songon i. Boi do gabe ndang tarbahen hita mamujimuji Debata manongtong molo ndang taida hataridaan ni Debata na songon i di ngoluna, di ngolu ni masyarakatna, di ngolu ni sada usahana, sada bangso nang sada huria.
Isarana, di angka dakdanak na tubu jala mangolu di bagasan sada inganan naung gabe sega tano na uli, songon i nang suansuananan dohot ngolungolu disi - isara di angka daerah pertambangan na marragam i na so mangihuthon ruhutruhut keamanan lingkungan, isara di Sidoarjo, Jawa Timur naung manaon siala naung use lumpur sian pemboran tambang - ndang boi diida rakyat na manaon disi na ia Debata i Panompa saluhut di bagasan na denggan. Manang, angka ruas masyarakat di humaliang Danau Toba andorang so ro sitaba hau di harangan bahen bohal tu industri mambahen harotas, mansai mura do angka na mangolu di humaliang taoToba on mamuji Debata di na tinompaNa i. Ndang mansohot nasida mamujimuji Debata. Alai dung lam suda hau sian Tapanuli Raya on, gabe maol do naporsea i mamuji Debata panompa i, ai ndang tarbahensa be mamuji Debata, baliksa mabiar hita mamuji Ibana ala naung tasegai humaliang ni tao i. Songon i ma nang di haiason ni tao on. Najolo, ala songon i ma ias ni aek ni tao on, mura do ruas masyarakat dison mandok mauliate tu/mamuji Debata uju boi mambuat dohot manginum aek na ro sian dolok dohot na mian di tao Toba i, ai ndang adong na songon on ulina jala songon i ias ni aekna. Alai dung ndang dijagai angka pegiat perhotelan dohot angka usaha pertenakan pinahan lobu dohot kerambah dekke raksasa, jala siala ni i gabe longsor do ro ala ndang adong be hau sitahan dohot sipaias aek, gabe kotor ma aek ni tao on. Baliksa mamuji Debata, gabe mabiar uhumon ni Debata hita ala nunga tasegai na tinompaNa.
Songon i do tong di kutub utara: Andorang so cair angka es i disi, tung so haotapan halak mamuji Debata disi marnida uli ni es na tobal disi. Alai ala nunga lam mohop portibion, angka pamarenta dohot pengusaha pe ndang marsitutu mangorui mohop ni portibion marhite na mar-energi terbarukan, ndang be torus marenergi fosil, gabe maol do halak mamuji Debata. Baliksa do na manggohi roha ni jolma, i ma mabiar di uhum sian Debata Partigor na manguhum jolma i na manegai na tinompaNa.
Songon i do pamujion di Debata Siparmudumudu ngoluon. Di angka dakdanak di sada bagas na marnatoras na burju jala malo mulaulaon, na ringgas, na hipas, na bisuk mangula gabe sai adong na ringkot di jabuna, sahat tu na tuk paadongkon na ringkot tu marsikkola, pangoli anak/boru, dohot parade modal usaha tu angka ianakkonna na mamonai ulaon, mura do angka ianakkonna mamuji Debata manongtong. Alai molo hurangan do tongtong ngolungolu ni dakdanak i ala losok mulaulaon natorasna, parmabuk, dohot ndang bisuk parade na ringkot tu jabuna, tung maol do nasida mamujimuji Debata.
Songon i do tong angka bangso di portibion: Molo malo do bangso i mangurus angka na tinompa ni Debata i marhite marbisuk parade dohot mangurus na ringkot di ngolu ni bangso i, gabe boi adong ris sipanganon dohot siinumon di rakyat, boi sude marsikkola, boi sude adong ulaonna, boi adong parmiananna, boi denggan perawatan di na marsahit, boi adong dana pensiunna uju suda gogo, boi do ummura bangso i mamujimuji Debata. Baliksa do molo mansai godang napogos, godang na so boi marsikkola, na so boi dapotan ulaon, godang na marsahit i mate ala ndang denggan pangubation, baliksa mamuji Debata, gabe manungkun panarihonon ni Debata ma angka rakyat.
Songon i do tong na masa di sada kekuarga, luat, huta, kecamatan dohot kabupaten, provinsi dohot negara nang institusi na marragam i: Molo ndang adong pengadilan na tigor sian tingkat keluarga, desa, negeri, tinggi, Mahkamah Agung dohot Internasional di Denhag, ndang tarbahen angka na manaon ala so adong hatigoran diida mamuji Debata na tigor i.
Songon i do tong di Debata Sipalua: Molo nunga adong kebebasan di sada keluarga sahat tu Negara, mura ma sude mamuji Debata. Baliksa molo adong dope penjajahan. Maol hita mamuji Debata Sipalua.
Songon i do tong di tongatonga ni angka ruas masyarakat difabel nang anga na sopot so marama, sopot so marina di sada huria nang inganan, desa, kelurahan, kecamatan, kabupaten, provinsi, negara: Boi do dohot nasida mamujimuji Debata molo sari do hita tu nasida. Ditanda Songon i do pamujion di Debata Siparmudumudu ngoluon.
III. Ala ni i do, hamu angka dongan, jamitanta sadarion manosoi hita asa olo gabe ulaula ni Debata mangurupi hita sandiri nang donganta, nang natinompa ni Debata di ngolu nang humaliangta, laho mangaradoti na tinompa ni Debata, asa tarbahen hita dohot donganta mamuji Debata: Mangurupi angka na so dapotan sipanganon dohot siinumonna, mangurupi angka na tartaban, dohot dongan difable, dohot angka na tinompa na asing, asa boi hita rap dohot nasida mamujimuji Debata manongtong. Tapadao ma na so mangaradoti/mangurus denggan na tinompaNa, jolma manang na asingna i. Mansai ringkot do on di na masa dope jala dung masa KTT (Konferensi Tingkat Tinggi) United Nations Claimate Change Conference (CPO26) 31 Oktober-12 November Taringot tu Lingkungan Hidup, na dipatupa di Glasgow, Skotlandia, Britania Raya, manghatai taringot tu songon dia ma sude bangso boi rap mangaradoti na tinompa ni Debata, tarlumobi hita di Indonesia na sanga leleng ndang radot, alai nuaeng nunga mamungka radot.
Amen
Administrator 