Puisi : PULO SIBANDANG

Administrator Administrator
Puisi : PULO SIBANDANG

nunga hutatap ho sian Muara

alai partingkian mambahen ahu ndang dope sanga

ro mebat tu ho

nunga hutatap ho sian tonga ni tao

tingki markapal sian Sipinggan tu Muara

alai, tong ma i

partingkian mambahen ahu

ndang dope sanga

ro mebat tu ho

ho ma i Pulo Sibandang i

pulo paidua na umbalga di tonga ni Tao Toba

pulo Samosir ma ia nomor sada

pangisim ndang sadia

holan saotik do lobi sian saribu

alai godang sian nasida borua

angka partonun na radot jala na padot

si jalin bonang gabe abit na bagak

ulos harungguan ma apala na tarbarita

napu do tanom

tubuan marragam suansuanan

dohot ma i mangga parparbue na tung tonggi

mangga udang ma didok goarna

o ho Pulo Sibandang

ala di ho adong marragam na ringkot siidaon

pamarenta nunga paojakhon

ho gabe sada sian sampulu onom

na didok geosite ni Geopark Kaldera Toba

o ho Pulo Sibandang

bege ma ahu marpadan

di sada tingki na ingkon do

ahu ro mebat tu ho

Panusunan Simanjuntak

Sawangan-Depok

17082022

Komentar
Berita Terkini