Poda Paborhat Pangaranto

Djalan Sihombing
Administrator Administrator
Poda Paborhat Pangaranto
Ist | Pelita Batak
Djalan Sihombing

TINGKI na jolo, biasa do marsipanganon laho paborhathon pangaranto. Sae marsipanganon, dipodai ma anakhon na i. Biasana ianakhon baoa do mangaranto. Dipodai ma anangkon na naeng mangaranto i. Lungun do roha ni natua-tua paborhat anakna, alana sotung i do ujung parjumpangan nasida.

Molo na jolo, ndang songon saonari on dope, nunga mura komunikasi jala alat transfortasi pe nunga mansai hatop. Boi ganup tongkin ditelepon.

Molo na ujui, dung lao mangaranto, ndang boi be hubungan, ai so adong dope telepon. Ndang diboto situasi inganan di pangarantoan na. Molo inongna, sai dipaingot-ingot jala ditangianghon do anak na i ganup borngin.

Poda na parjolo, biasa didok tu ianangkon *taringot tu induk somang*. Pintor lului amang na boi songon na tua-tuam di pangarantoanmi. Burju ho amang tu induk somangmi, songon panggantinami na boi pangalu-aluanmu.

Poda na paduahon, ima *pantun hangoluan, tois hamagoan*. Molo pantun do ho amang tu sude jolma, gabe holong do rohana tu ho. Ingkon burju do ho manise donganmu, halak dia pe taho i.

Unang tois roham mamereng donganmu jolma. Molo pe dumenggan parngoluonmu sian donganmu, unang haginjangkon i amang. Ai olo do di sada tingki, ibana na boi mangurupi ho. Unang leas roham. Di sada tingki, boi do na hurang sangap dibereng jolma, gabe marsangap, jala na pogos i pe boi do gabe mamora, na mora i gabe marpogos.

Poda na patoluhon taringot tu *sibahenon tu dongan*. Molo adong di ho arta manang parhepengonmu na lumobi sian donganmu, unang gabe ginjang roham. Sian Tuhanta do sude na i. Boi do habis saluhut na i dibagasan sangombas.

*Molo pe ndang boi diurupi ho donganmu, ndang boi las rohana dibahen ho, unang bahen hansit ni rohana*. Sotung ala ni hatam dohot pambahenanmu *hansit situtu jala mansai lungun rohana*.

Ingot ma podangki amang. Hansit do parngoluanta di hutanta on. Dang adong bahenonnami sihumisik siboanonmu tu pangarantoanmi.

Diboto ho do amang, na tagadis do tanonta si saotik i, jala na tapinjam do deba hepeng sian bapa udam asa adong ongkosmu.

Ingot hami amongmu, inongmu, anggim, nang ibotomon.

Sotung lupa ho tu hami.

Sotung lupa ho di podanami.

Huhut ma tangis mamodai anak na i. Roma ilu ni anak na i. Mansai lungun dihilala laho maninggalhon amongna, inongna, anggina, dohot iboto na i. Las rap tangis ma nasida sude, ala ni lungun na.

Lungun roha ni anak na i maninggalhon donganna satorbang saparmeaman di huta i.

Dung sae dipodai, ditutup ma dohot tangiang. ***

DJS'Bing 07/06/26

Komentar
Berita Terkini