GOMPIS JALA ROSROS

Administrator Administrator
GOMPIS JALA ROSROS
IST|Pelita Batak

GOMPIS JALA ROSROS

==Panusunan Simanjuntak==

Di ganup bona, bulung, bunga dohot parbue ni suansuanan na tubu di alaman ni bagasta, huida gompis ni sipangambem dohot rosros ni roham mangaradoti parngoluon nasida.

Ndang mamereng ari ndang marnida tingki, sai disangahon ho do mamareso ganup suansuanan i laho mambahen nasida tongtong uli. Di tingkina, diaeki ho nasida.

Ditampuki ho angka bulung naung malos, ditampuli ho ia angka dangka naung gabe ranggas. Dihurak ho tano laho manuan suansuanan na imbaru, dinapui ho ia angka na maheu. Ndang magigi ho nang pe simanggolommu margulugulu tano. Ndang marhoihoi nang pe sian pamatangmu hodok manetehi.

Sipata, ala ni manang aha, dipahusor ho parpeak ni suansuanan na sinuanmu di pot palastik, di tano manang di keramik. Na deba, dipapinda ho sian on tu san, manang sian an tu son.

Minar bohim jala hillong simalolongmu marnida angka suansuanan i na denggan tubu.

Marbona na togos, marbulung na godang, marbunga na bagak, jala marparbue na ramos ma hamu angka suansuanan na niradotan ni inanta i dohot simangambe na gompis nang roha na rosros.

Sawangan-Depok

15 November 2018

Komentar
Berita Terkini