AI DIINGOT HO DOPE ITO

Administrator Administrator
AI DIINGOT HO DOPE ITO
IST|Pelita Batak
Ilustrasi seorang pria di tepi pantai Danau Toba

AI DIINGOT HO DOPE ITO

Oleh :Panusunan Simanjuntak

Di sada ulaon na ribur maruning-uningan di topi ni Tao Toba. Sian hundulan na ndang apala holang, marsiberengan nasida na dua. Mengkel suping na sahalak tu na sahalak. Niantusan ma amanta dohot inanta naung marumur lobi sian pitupulu taon i, lam tarida do herut-herut ni bohi ni nasida di tingki na mengkel suping i. "Hira na hutanda do ompung boru an", ninna ompung doli i di bagasan rohana. Songon i nang ompung boru i marsungkun do di bagasan rohana maradophon si ompung doli i.

"Horas ompung", ninna sahalak naposo huhut manjalang amanta na matua i. Hundul ma ibana di lambung ni ompungna i. Marnonang nasida. Di na marnonang i sai jerbeng do simalolong ni ompung doli i tu ompung boru i. "Anggi, ditanda ho do ompung boru an?", ninna ompung doli i marsungkun dohot soara hira na marhusip. "Bah, ompung borunghu do i", ninna naposo i. "Ompung borunghu sian horong ni tulang", ninna ibana. "Molo boti, sungkun ma jo ompungmi manangna ditanda ibana do ahu. Dok goarhu si Pardenggan Roha. Ia goar ni ibana si Bunga Nauli. Sahuta do hami najolo", ninna ompung doli mangidohon.

Toho ma tutu, nasida ma i na rap dongan simagodang di tingki sihaetehon di huta Huraba, Aek Puli, Pahae Jae. "Nunga huingot. Eee tahe si Pardenggan Roha on", ninna ompung boru i. Bohina lam minar.

Ditogu-togu si naposo ma ompung boruna i laho mandapothon si ompung doli. Ala ni gogo ni suara ni angka parende dohot musik ni nasida, diarahon si naposo ma na dua ompungna i tu inganan na umpulik, na unjonok tu tao. Di na rap mardalan i, si naposo ma na di tonga-tonga ni na dua halak na matua i, na mardalan nunga bungkuk, nunga martungkot. Hundul ma na dua na matua i di sada bangku, di linggoman ni sada bona parbulung na lomak.

Sian partuturan, ndang adong na mambahen gabe subang di nasida hundul padua-dua, na mambahen nasida gabe marbao. Hot do partonding ni partuturon nasida, marito na boi marsihaholongan.

Ragat do nasida na martaringot i. Sipata mengkel nanget. Ndang diingot nasida be di taon sadia nasida rap di huta na parpudi. Alai parjolo do si Pardenggan manadinghon huta laho tu parjalangan. Sanga do ibana gabe kondektur ni mikrolet di Jakarta. Dung i gabe anak kapal ni sada kapal siboan barang tu marragam inganan di Indonesia on. Di ujungna gabe kapten ni sada kapal barang na balga do ibana sahat tu na pansiun mula-ulaon. Di Jakarta do ibana marhuta, mardongan saripe poribanna, jala marpinompar sahat tu naung marpahompu saonnari. Ia si Bagak, diboan namboruna do ibana munsat tu Tanjungbalai di tingki bajar-bajar dope. Disi ma ibana marhuta, marhamulian, marpinompar sahat tu na marpahompu saonnari. Nunga rap mabalu nasida.

Tompu so do nasida marnonang umbege sahalak baoa parende parsoara na mansai bagak. Di bagasan roha, dipaihut-ihut nasida tong nang hata-hata ni ende i:

"Ai diingot ho dope ito rap dakdanak uju i

Rap marmeam-meam di hauma manang di balian i

Ho marlojong-lojong dibatangi laos huadu sian pudi

Laos tinggang do ho di tingki i

Sap gambo bohimi

Ai diingot ho dope ito na di parsobanan i

I ma na so tarlupahon ahu tingki ro ma udan i

Laos hubungka ma da bajungki asa adong saong-saongmu

Tung mansai gomos do ho huhaol

Asa tung las ma dagingmi

Hape dung saonnari nunga leleng ndang pajumpang dohot ho hasian

Nunga adong marpulu taon ndang hea huida ho

Molo tung naung muli pe taho ndang na pola sala i da ito

Asal ma huida bohimi nunga tung sonang rohangki

Anggo ala rongkap do ito Tuhanta do umboto i".

Hohom songon na tarhatotong nasida na dua umbege ende i. Dung i, hira na tarsonggot dungo sian na renge di parsidung ni ende i. Dipadompak ompung doli ma parhundulna mangadophon ompung boru. Dohot bohi na patuduhon holong ni roha, holong ni roha sian sihadakdanakhon, jala dohot soara na nanget, marpanungkun ibana: "Boi dope hugolom tanganmi .... ito?"

Sawangan-Depok

22 Oktober 2022

Komentar
Berita Terkini