Marsisulu

Oleh : Sampe L. Purba
Administrator Administrator
Marsisulu
FB/Sampe L Purba
Marsisulu
Marsisulu - on ma sada hasomalan/ tradisi na jolo di luat nami. Tano ngali na margoar Lumban Silintong Doloksanggul. Nihaliangan do tataring,  gor ma soban dipatuba tuba, laho mangalo ngali ni ari i. Ai tung manihit manorus do humaliang. Tarlumobi ma siborngin hira na manombus sahat tu holi-holi, ihut  ma muse tu pangunggis ni alogo. Ala ni ngali ni arii, mandalhot (beku) do miak makkan (minyak goreng) di bagasan botol, jala simanogot pe mar uap manang songon na berasap do hosa ni jolma molo manghatai. Pas ma hira songon na di pilim barat molo musim salju.

 

Ia soban i digoar do tunggar. Tunggar ima angka hau narobi na gunop di hauma manang di akka adaran panakkalan ribuan taon na lewat. Balga balga do haui, adong namarlilit dua meter, terutama bonggol manang bona ni uratna. Ingkon diungkit/ ditambang do on, bagasna hira  sahat tu dua meter. Hira open pit penambang batu bara.  Marsiurupan do na marhombar balok laho mangungkit tunggar. Laos di si ma ditahai menggunakan kampak khusus naginoaran takke.  Tano na humaliang  soban i pe boi do galak. Gabe ginoar do on tano galak. 

 

Tamba do kesuburan ni tano molo dihali tano galak i. Ai hira gambut lempung do jenisna.  Ditutung  do tano soban i sebagian di lambung parsobanan. Didok mai mamuruni. Timus nai mambahen las, jala boi ma huhut manutung gadong/ ubi rambat  manang sirio/ ubi kayu, songon tamba ni tugo/ bohal. Ai maol jala mengeluarkan tenaga do antong na marsoban i. Dao do tombak/ hutan sian huta nami. Tuani do adong partunggaran i. 

Sahali sataon do marsoban, ikkon papunguon do soban laho persediaan sahat tu taon na ro. Laho bahan bakar siganup ari, molo naeng marpesta, manang tumagam haroan. 

 

Tarlumobi ma  molo tumagam haroan (ina na naeng melahirkan). Mansai porlu do soban on. Ai ia dung sorang dakdanak i, ingkon di lambung ni tataring i do mainundun ina, asa las laho memulihkan gogo jala tumibu muse dorgis nasida. Lobi hurang dua sahat tu tolu minggu inai manundun. Soban na balga - saganon - do ditutung manipat tahan saborngin.  Laos i do umbahen na didok hata halus ni ina na sorangan, nai tataring. Jala ala sekaligus do ditundunhon natinubuhonnai, didok mai natundunan. 

 

Godang do peristiwa budaya dan kearifan lokal na marhadomuan tu na marsisulu. Misalna, tataring sai di tonga tonga ni dapur do. Ndada songon model stove/ anglo di jabu modern manang Barat rupani, di suhi suhi. Holan di sekitar Doloksanggul tano ngali do tataring di tonga tonga ni dapur. Adaptasi kecerdasan local genus doon. 

 

Sihaliangan do tataring. Nidadang ma tangan dohot pat, hona sipata tu sirabunnai. Laos ala niido godang na panaha nahaon/ masilbak tumit ni akka jolma di hitaan.  Ndada dipardulihon i. Na penting las dagingi. Apalagi ma  dung mulak sian balian, sadari manipat margambo margalisop molo musim suanon manang ombakon misalna. Sambil manghodohon di dalihan/ pangalompaan gadong manang indahan marsisulu do iba. Sada tinembak godang na hona. Hata nuaeng - multi tasking activities.  

 

Dung sun marsipanganon, laos disi ma marlaning laning, tarmasuk mai manaringoti akka adat, poda nang ugamo tu haserepon. Soft transfer of knowledge and character. 

 

Di ginjang ni tataring i adong do para-para. Di atas ni para para i disale soban. Timus ni pangalompaani do mandadang soban i, gabe miok tutunghononhon. Tamba awet muse do tarup ni ruma molo sai adong timus. Di para para   disale gulamo/ ikan asin. Bertahan do gulamo i parsamingguan ndang gulokan antong. Ai sahali saminggu do onan. Ditutung ma manang na piga gulamo gambas on ganup ari songon lompan. Maksimal do sada sahalak. 

Adong do tehnik/ kiat manutung gambas. Unang sanga mosok uluna. Alai boi ma mosok anggo sisikna. Niombus ma sisiknai pa laho sirabun na lohot huhut songon na pinapitpit unang halimponan. Tabo hian do marsipanganon apalagi molo adong pote/ palia na tinutung laok ni gambas i. Ulu na agak mosoki, dilapuhon ma tu hua ni ikkau rata. Songon tambulna. 

 

Di para para do di sale molo nunga mapipil tali pusok/ pusar ni dakdanak. Ndang pola binoto korelasi ni tali pusar naung mapipil on tu kejiwaan ni poso-poso. Alai umumna, molo maol do kering tali pusar nadisale i, antar rewel do dakdanak na baru sorang i. 

 

Molo adong sorang dakdanak, sai ro do lebih kurang saminggu sahat tu dua minggu bornginnai akka ama ama na di hutai marpungu pungu/ maranggap tu jabu ni na sorangani. Sisoli soli doon. Lapatanna molo ringgas sada ama tu pandungoan, molo giliran ni pardijabuna sorangan, ro ma akka dongan tu jabuna. 

 

Alai ala godang do akka usia produktif di huta, jala ndang haru masa dope na mar KB, ra olo do hampir 24 minggu di bagasan sataon sai marganti sorin pandungoan. On do ra umbahen na so pola romantis ama ama di hitaan, alai sekaligus ndang boi dirajai ina. Ndang pola adong ama na DeKaI di hitaan. 

 

Adong tolu fungsi ni namandungoi. Parjolo mai, mangihuthon  tradisi na jolo.. asa humitir begu jau. Ai angur do ninna kotoran ni baby/ dakdanak tu akka begu khusus/ tertentu. Alai mabiar do begui molo dungo dope akka jolma. Molo tangis manang nguak nguak poso posoi siborngin, dipatarus ma. 

Olo do maila mula mula ina tarlumobi parsaurangan patarushon poso-posona. Ai ingkon menghadap tu natorop i do, manundalhon tataring sambil manundun. Alai pintor dipinsang simatuana boru do molo maila patarushon sada ina. Jadi mulai sian i ndang maila be ina mambuka kutang/ korsetna molo patarushon.  Ido alana umbahen na ginoar anak pertama, anak buha baju. Ai mulai sian ibana mura talak jala bukka nama ohop ohop ni ina.   

Sipata tahe hurbe-hurbe. (Jala ndada sihalanghonon manang haduk akka ina patarus gellengna di jolo ni natorop. Hal biasa do songoni).

Alai molo sai tangis dope poso posoi ndang ala na mauas, adong mandok na naeng digaiti begu do. Pintor dungo do antong akka ama - believe it or not - gabe sumurut ma begui. Menak do dakdanak i. Paduahon, adong do marturi turian manang marsastra lisan na matua siborngini paima modom. 

Hikayat/ dongeng marlaok poda do akka turi-turian i. Adong mai turian ni Sitape bunga boru, Nan jomba ilik, si Jonaha, Parboniaga so punjung, Sitapi nauasan dohot akka na asing. 

 

Adong do huingot sada natua tua na sangat berbakat marturi turian. Nang pe diparulak ulakhon sian taon tu taon, sian jabu tu jabu, tong menarik begeon songon na mangandung andung. Pitpit do amantaon sambil bercerita. Jala cerita bersambung doon manang na piga borngin.  Hasanduan do iba mangarunggui songon na mambege ende. Parsaba saba do digoar natua tua on. 

 

Na patoluhon.. laos di paranggapan/ pandungoan on.. paima  mondok ondok  olo do markartu-kartu manang manang markoa akka ama. Daon lalap doon, jala otik otik do partaruanna. Social bounding.  Alai tu nuaengon nunga didok on gabe juji. Adong mandok, memang naung tawarisi do kebiasaan i di bawah alam sadar. Ido alana sipata sandu halak hita nang pe naung di kota, markartu, marsatur manang marbento. 

 

Di zaman modern on, ndang piga be marsoban tunggar. Nunga adong soban hau dohot tabung elpiji. Jala cuaca pe ndang be ngali songon na joloi. Adong mandok, sebagian pengaruh perubahan iklim doi, termasuk mai penggundulan hutan di sekitar dolok ni tao toba. 

 

Sangat berkesan do na marsisului. Di na mulak tu huta hami baru baruon dohot akka dakdanaki, nang pe naung mardakdanak iba, jala beranjak magodang nasida, momen rap marsisulu dohot natua tuai.. so i nama nikmatna. Sehat jala horas-horas ma hamu Damang Dainang, di hatutua ni pamatang muna, na tongtong sipartangiang jala siparorot di partondion tu angka pinomparmon da. Jakarta,  Desember 2016. (Sampe L Purba)

Komentar
Berita Terkini