TERHARU au manjalo tongosan ni inang Lince Nainggolan: buku torsa-torsa (novel) marhata Batak RO DO AU MANOPOT HO na baru diterbithon nasida melalui penerbit Teras Budaya, Jakarta.
RO DO AU MANOPOT novel marhata Batak patoluhon na ginurit jala diterbithon nasida dibagas dua taon on, dung HOLONG DO ROHANGKU TU HO (dang mar-ISBN) dohot RONGKAP (penerbit Selasar Pena Talenta). Tolunsa torsa-torsa on jolo diapadar nasida songon cerita bersambung di grup facebook marhata Batak GP3 (GRUP PALAMBOK PUSUPUSU (GP). Sambutan ni angka dongan panjaha di grup I do mambaen gabe giot roha nasida menerbithon gabe buku.
Dang piga ari dung manjalo RO DO AU, tarbege barita nauli mandapot Anugerah Sastra Rancage 2022 lae Ranto Napitulu marhite torsa-torsa na gunurit nasida BORU SASADA (penerbit JBS). Yayasan Kebudayaan Rancage, na pinajonjong ni sastrawan Ajip Rosidi nahinan, rutin do mangalehon penghargaan tu sastra daerah, tarmasuk Sastera Batak.
Lae Napitupulu on pe nunga menerbithon dua novel marhata Batak dibagas dua taon on. Andorang so BORU SASADA, dipaadar nasida novel ULOS TALI-TALI (penerbit Teras Budaya).
Ala sarupa sama-sama ruas ni partungkoan marhata Batak GP3 do inang Lince Nainggolan dohot lae Ranto Napitupulu, gabe taringot ma muse inang Adventina Siregar naung paadarhon dua novel marhata Batak: HOLONG PAMUHAI dohot HOLONG NA POLIN, duansa marhite penerbit Teras Budaya, Jakarta. Songon inang Lince Nainggolan, sian torsa bersambung di grup GP3 hian do novel ni inang Adventina Siregar on.
Jujur ma dohononku, tung cemburu jala kagum do au tu tolu panggurit on, terutama inang Lince Nainggolan dohot Adventina Siregar. Ina rumah tangga, inong ni tolu dakdadak do inang Adventina Siregar. Dang na panggurit hian nasida. Songon I inang Lince Nainggolan. nunga marumur 73 taon inang on. Jala dang berprofesi penulis, manang guru hian nasida. Ina/ompung ruma tangga do. Luar biasa. Molo lae Napitupulu, memang nunga jotjot hian manggurit di koran tingki kuliah di Medan. Karejo di swasta do nasida di Riau.
Dang pola bahasonku isi ini angka novel ni lae dohot dua inang on. Na saleleng on, tung jotjot ma binege, godang halak hita Batak holsoan, ala naung terancam punu hata Batak i. Alana di bonapasogit pe nunga marhata Indonesia dakdanak dohot natua-natua, nang pe diboto dope marhata Batak. Apalagi ma di pangarantoan. Jarang do angka dakdanak na sorang di parserahan boi marhata Batak. Molo salpu generasi nuaeng on, olo do salpu hata Batak i.
Literasi, angka sijahaon do sada dalan padimun-dimun bahasa. Hape nunga leleng dang adong angka buku sijahaon na marhata Batak. Boi dohonon tung hira na maliali (yatim piatu) do literasi Batak. Yakin do au, angka halak Batak naboi dope marhata Batak nuaeng on olo ingkon nanget-nanget manjaha angka torsa-torsa (novel) marhata Batak na di ginjang on. Ala dang biasa, jalan tar asing do hata Batak lisan dohot tulisan. Apalagi molo hata Batak klasik, hata andung, songon na ginurit ni bere @Cisilia Siagian di buku ANDUNG SIAN SIRAMBE. Olo bingung.
Jadi tung mauliate ma tu angka panggurit on na olo menekuni pangguriton ni torsa-torsa jala menerbithon torsa on gabe novel. Membiayai sandiri do nasida, jala manggadis sandiri, lao paulak ongkos cetak penerbitan i. Jadi, asi do roha molo so pola adong na berminat manuhor buku nasida. Boi lapatan I, hira holan hata do mabiar hita punu hata Batak i.
Mauliate do tong dohonan tu grup-grup marhata Batak songon GRUP PALAMBOK PUSU naung pasorang godang panurat. Niingot dope gerak awal ni grup na nigerakhon ni amangboru Tansiswo Siagian on, mambahen lomba situriak (cerpen) marhata Batak jala dipaadar situriak na monang I gabe buku ANAKHON HI DO HAMORAON. Niingot. ala dohot gabe juri ni lomba manggurit dohot editor ni buku i.
Mauliate ma di angka penerbit na olo mangurupi angka dongan panggurit menerbitkan buku nasida, songon penerbit Selasar Pena Talenta na nikelola ni amang Saut Poltak Tambunan. Songon ni penerbit Teras Budaya, Jakarta, na kinelola ni amanta Remmy Novaris DM. Halak Menado do amanta on, alai las do rohana mangurupi menerbithon buku-buku sastera Batak. Memang spesialis penerbit buku sastra do nasida. Alai I ma, dang boi mangurupi mengedit.
Sian sude on, na huparrohahon, nunga porlu adong pelatihan ni editor buku na marhata Batak. Alana hubereng kelemahan umum ni angka buku marhata Batak on editing do. Baik editing cerita, maupun editing bahasa. Sementara, nunga leleng dang adong pola binoto editor bahasa Batak, ala na so pola adong I penerbitan. Jadi editor personal do, ala na pengarang songon amang SPT.
Na parpudi, jala paling penting, dukungan ni halak Batak tu angka penerbitan ni buku marhata Batak. Menurut Sensus 2010, nunga adong 8 juta lobi halak Batak. Adong mandok, belakangan on nunga hampir 10 juta. Boasa manggadis 300 -500 eksemplar buku pe tung apala maol? Molo so Halak Batak do na mendukung, manuhor angka buku marhata Batak on, ba ise do? IF NOT US, THAN WHO…?
Depok 2/2/2022
Administrator 
