Jamita Evangelium, Minggu XV Dung Trinitatis "Marhabisuhon di bagasan Jesus" (Markus 8: 31-38)

admin admin
Jamita Evangelium, Minggu XV Dung Trinitatis "Marhabisuhon di bagasan Jesus" (Markus 8: 31-38)
Ist
Dr Robinson Butarbutar
Pinatolhas ni Pdt Dr Robinson Butarbutar, Ephorus HKBP.


Hamu angka Dongan sahaporseaon,


Mamungka sihametmetonta sahat tu na tatadingkon ngolungolu di portibion di ujung ni ngolunta marragam do pangajarion na diajarhon tu hita, na taparsiajari sandiri, dohot na tahangoluhon di pardalanan ni ngolungolunta. Tagoari do i habisuhon na taharingkothon di ngolungolunta. Alai na boi do dia na tadok, tahaposi, dohot tahangoluhon habisuhon i sasintongna ndang apala habisuhon molo tapaadop tu lomo ni roha ni Debata na umboto dia na dumenggan di hita hajolmaon on. Isarana, uju marumur saratus taon dope HKBP mangula di tano/negara Republik Indonesia, i ma taon 1861-1961 ia habisuhon naung tatea, diajarhon jala dihaposi ruas dohot partohonan ni Huria Kristen Batak Protestan i ma songon on: "Nasa na mangolu di bagasan hatigoran, i do na mardohar di ngolu on, ai dihalomohon Debata do na marhatigoran." Ala ni i do diajarhon tu hita sude asa ringgas marhatigoran dohot mangalului hapistaran marhite na marsikkola sadenggandengganna dohot satimbotimbona, ai diharingkothon sada bangso dohot negara do na pistar dohot na mangolu/mangula tigor. Ala ni i, uju i bahat do ruas ni HKBP na denggan-denggan ngoluna.


Alai di partingkian parsitongaan rejim Orde Baru, i ma di ujung ni taon-70-an/mamungka taon 70-an sahat tu hadadabu ni Pamarenta Orde Baru di negaranta di taon 1998, ndang i be na ditiop bahatan rakyat Indonesia songon habisuhon, alai nunga meret be tu na maralo tusi. Ndang hatigoran dohot hapistaran be, alai nunga tu korupsi, kollusi dohot nepotisme, nang diskriminasi. Na manghangoluhon i denggan ngolungoluna. Ndang otik manang adong do manang na piga uju i nang ruas ni HKBP na manjalo habisuhon na imbaru i, na tangkas maralo tu hata ni Debata. Alai, ala ni pangunjunan maniru habisuhon na imbaru i, ba gabe adong deba ruasta na mangihuthon i. Na so manghangoluhon i ndang denggan ngolungoluna.


Alai dung madabu rejim Orde Baru, masuk hita tu era reformasi/transformasi sahat tu nuaeng di bangsonta na niuluhon ni Presiden Joko Widodo, ndang apala i be habisuhon di ngolunta songon bangso. Alai nunga mulak muse tu na sintong, i ma ingkon tigor pistar dohot marhatauon na timbo do sipasomalon dohot siparangehononhon. Tarlumobi dung lam margurasa sistim internetisasi manang digitalisai songon i nang transparansi dohot anti korupsi pe tahe, gabe ndang apala langku be manang ndang tarrgoar habisuhon be dohonon korupsi, kollusi dohot nepotisme, rasisme nang diskriminasi i. Molo tung adong pe i nuaeng di pengusaha manang penguasa, otik nama i jala nunga di bagasan biar sasalahak patupahon i, nunga mallobok taroktok ni halak patupahonsa. Tatangiangkon ma lam dihaposi sandok rakyatta habisuhon na imbaru, i ma holan angka na tigor, na pistar, na kreatif, na innovatif dohot na domu tusi do na boi diarop mamboan bangsonta tu hamajuon, hadameon, hatigoran dohot hadoharon, gabe negara maju di taon 2045, di na marumur bangsonta 100 taon.


Domu tusi ma tong nang habisuhon mandungdung kesuksesan ni ngolu. I ma ingkon kerja keras, disiplin, na trampil, kreatif dohot na innovatif, jala na barani berkorban, dohot na mangula dengan hati do dalan tu kesuksesan ni ngolungolu. Ndang dalan na losok, jalan pintas, na oto. Di partingkian nuaeng di partingkian digitalisasi lam diharingkothon do asa dipatimbo hatauonta di angka i. Ndang be songon andorang so nternetisasi segala sesuatu. Angka na mamangke angka dalan-dalan na maralo tusi ndang diharingkothon be di partingkian sinuaeng. Ala ni i ndang langku be jalan pintas. Gabe mulak ma muse diparsiajari dohot dihangoluhon rakyat na mangihut on: "Berakit-rakit ke hulu, berenang-renang ketepian. Bersakit-sakit dahulu, bersenang-senang kemudian."


Angka sisean na olo mamarsiajari, menghaposi dohot manghangoluhon habisuhon na songon i do na dihasiholi Tuhanta Jesus najolo di abad parjolo nang di angka abad dung i, nang di partingkianta nuaeng, di dekade patoluhon abad pa-21-hon, di era digitalisasi. Uju mangula Ibana songon Rabbi di tongatonga ni bangso Jahudi na nirajaan ni Kaisar Rom, angka raja sian keluarga Herodes nang sian keluarga ni angka malim/malim bolon di bagas joro nunga gabe hasomalan di angka na manguluhon dohot na diuluhon uju i patupa nepotisme, rasisme, diskriminasi, dohot jalan-jalan pintas. Angka sisean ni Rabbi Jesus pe nunga sanga digohi habisuhon na songon i. Ala ni i, di na dipabotohon Ibana tu angka siseanna na ingkon adopan ni Gurunasida Jesus do/ma angka parungkilon na pola mambahen Ibana agoan hosa, mate jala ditanom dung i hehe muse di ari patoluhon (ayat 31) songon dalan di angka na mangahasogohon ulaonNa na mansai denggan uju i, alai so dirajumi nasida gabe dalan na denggan di Jesus laho patulushon sangkap haroroNa tu portibion - i ma paluahon hajolmaon sian huaso dosa dohot hamatean na manongtong -, gabe ditulak nasida angka siseanNa i ma habisuhon na pinatolhas ni Jesus i marhite sada jurubicaranasida, i ma si Petrus (ayat 32).


Di si Petrus, ndang i dalan sipangkeon ni Jesus nian pasauthon sangkapNa. Boi dope dalan na asing, i ma unang dioloi Jesus dipaso angka alona i Ibana marhite na manangkup dohot pamate Ibana. Ai marhuaso do Ibana mamangke dalan-dalan pintas, i ma mamangke huasoNa laho pasohot tahitahi nasida i. Alai di Tuhanta Jesus, ndang habisuhon na saurdot tu lomo ni roha ni Debata na mambuat dalan pintas, manang hasoradeon mangadopi dohot mandalani sitaonon sahat tu hamateanNa. Alai ia habisuhon na saurdot tu lomo n iroha ni Debata i ma dalan kerja keras, dalan na digohi perjuangan dohot parungkilon laho pasauthon lomo ni amaNa tu Ibana dohot sipatupaonNa. I do umbahen nan dang dioloi Jesus jongjong si Petrus di joloNa laho mangoarai manang mangambati Ibana mandalani dalan na maol i, via dolorosa i. Di Jesus, ingkon marhite dalan perjuangan do sidalanhonon ni angka sisean na mangihuthon Ibana, ala ni Ibana, dohot ala ni barita nauli na dibaritahon dohot dihangoluhon nasida (ayat 35) pola sahat tu haradeon agoan hosa (ayat 34-37). Na mangulahon na marasing sian i, i ma maila ala ni Jesus manang ndang rade sahat tu agoan hosa ala ni Jesus dohot ala ni barita nauli, ndang tardok nasida angka siihuthon Jesus.


Mansai togu do roha ni Jesus di habisuhon na dihangoluhonNa dohot niajarhonNa tu angka siseanna i, i do umbahen na pola didok Ibana: Na so olo songon i ndang hatindangkononNa nasida/hita di hasangapon ni AmaNa dohot surusuruan angka na badia (ayat 38). Na marasing sian i do na tongon ditiop si Petrus dohot angka siseanNa i. Alai ni i do mansai koras Ibana maminsang si Petrus marhite na mandok "Unang ma ho jongjong di jolongku laho mangambati ahu, bolis (Gorik: hupage hopiso mou, satana = Laho ma ho sian jolongku, bolis), ai ndang dipingkihon ho angka na di Debata, angka na di jolma do (Gorik: hoti ou phroneis ta theou alla ta ton anthropon). Asa, ndang marpingkir songon, manang ndang mamingkirhon na piningkiran ni Debata (=ndang lomo ni roha ni Debata) jalan pintas, i ma dalan na so rade mangadopi perjuangan laho mandungdung sintasinta. Dalan ni sibolis do.


Boasa ma apala 'habisuhon ni Jesus na songon i, i ma haradeon mandalani dalan na maol laho, rahis, gok parungkilon mandungdung angka na hinalomohon ni Debata ndang na piningkiran ni jolma' na gabe jamita di hita ruas ni HKBP di partingkian on, i ma mangolu di partingkian Covid-19 on?


Sian bona ni hasasahat dohot hararat ni pandemic Covid-19 tu sandok portibion ndang marimbar tu Indonesia on, nunga dipangido World Health Organization tu sandok pamarenta di portibion, jala nunga dipangido pamarentanta di Indonesia on asa sude hita rakyat Indonesia padalan careful and hard steps, angka langkah na jamot dohot na koras laho pasohon hararat ni Covid-19 on. Mamungka ma i sian Working from Home and worshipping from home, (mangula sian jamu jala manomba di jabu), sahat tu PPKM dohot vaksinasi, asa boi tajaga keseimbangan ni hahipason ni pamatangta dohot hahipason ni pandaraman ni ngolungolu/ekonomi. Alai ala sanga lemba hita, ndang olo sude rakyatta mandalani dalan na maol, alai dalan na lemba, na sonang, na so adong pembatasan, gabe nangkok ma torop ni na disonggopi Covid-19 i di bulan Juni-Agustus. Alai dung rade hita unduk tu dalan na jamot dohot pembatasan-pembatasan pergerakanta boi gabe tuat di tongatonga ni bangsonta di bulan September na disonggopi Covid-19 i, sian nomor 1 hian di bulan Juni-Juli di portibion gabe nomor 13. Songon i do tong di angka ngolungolunta na asing, isara ingkon sahatophatopna bangsonta marhasomalan mangolu di era internetisasi segala sesuatu (IOT: Internetization of Things), ndang holan di parsikkolaan alai dohot do di ulaon na maraggam i.


Umbagas sian i dope ra sidohonon ni Tuhanta Jesus nuaeng on tu hita marhite habisuhon na pinatolhasNa i najolo tu angka siseanNa i. Molo tasulingkiti sejarah ni angka ulaon ni angka siseanNa i di abad parjolo sahat tu abad pa-21-hon, tutu do dioloi angka siseanNa/taoloi do habisuhon pinatuduhon dohot pinodahon ni Tuhanta Jesus i di ngoluNa nang di pangajarionNa i. Mansai bahat do angka tantangan niadopan ni angka siseanNa, angka siihuthon Ibana, dohot angka na manghaporseai Ibana di na mangulahon ulaon pinasahatNa tu nasida songon na tarsurat di angka evangelium i (isara Mat 28: 18-20, Markus 16: 15 dna) asa borhat hita mamaritahon barita nauli, goarNa, dohot mangajarhon pangajarionNa i di tongatonga ni angka bangso di portibion. Rumang ni tangangan i ndang holan na metmet, alai dohot do angka na balga dohot na so tartuhuk ni hita angka siseanNa i, pola sahat tu na pola marujung tu hamatean. Alai martahan do hita. Ndang maila hita. Laos disi do hasasaut ni harararat ni barita nauli i. Siala ni i go martahan naporsea i. Jala bahat na denggan na tapatupa di portibion. Alai tong do dohonon, ala adong na so patupa i, gabe madabu tu dosa patupa na so denggan hita di portibion, baliksa patupa na so denggan, na jat tu donganta jolma nang tu donganta na tinompa na asing.


Ala ni i diarop taruji manang diuji do nuaeng hasatiaonta mandalanhon dalan na maol situtu i di partinkian Covid-19 i, di na ingkon tahangoluhon angka dalan na maol laho mangadopi Covid-19 on. Jala bahat do angka ruasta na sinonggopan ni Covid-19 i jala naung agoan hosa siala ni i. Ra adong do sian tongatonganta na pola gabe gale haporseaonNa di Tuhanta Jesus i ala agoan dongan saripe, natuatua nang ianakkonta siala sinonggopan ni Covid-19. Ndang di sude partingkian diadopi naporsea di Ibana parungkilon ni ngolu. Alai apala di partingkian sinuaeng, di na taadopi dope Covid-19 on, mansai ringkot do hita mamarsiajari, manghaposi dohot mamarangehon habisuhon niajarhon ni Tuhanta Jesus i, di na mangolu songon halak Kristen di partingkian pandemi on, i ma: "Haradeon mangadopi dalan na maol, isara marhite na satia mar-3 T (Testing, Tracing, Treatment, 5 M (Marmasker, mamuri tangan, manjaga jarak, mandao sian hariburon dohot mangorui mobilitasta) nang mar-Vaksinasi, songon i ma nang di angka gulmit ni ngolunta na marragam i. Dipatau Tuhanta ma hita mandalani dalan na mansai maol di tingkion marhite marhabisuhon ni Tuhanta Jesus i. Amen.

Komentar
Berita Terkini