Napaduahon, i ma nasida na manghaporseai na di diri ni angka debata na binahen ni jolma i do hagogoon ni Debata na sadadasa i tarida. Ala ni i tu angka i ma nasida mangido hagogoon. Sian sada tingki tu tingki na asing, manang sian sada ingangan tu ingangan na asing marasing do hataridaan ni angka i. Di era Revolusi Industri na paopathon dohot na palimahon na godang mamangke Ilmu Pengetahuan Teknologi, dohot do angka teknologi i dihaposi gabe singkat ni Debata na sasada i. Ala dipaneang teknologi i do ulaon na dokdok ni jolma i, gabe dohot ma disomba angka i. Napatoluhon, i ma na manghaporseai na adong do Debata, alai ndang pos rohana na tarbahen Debata na sun gogo i do mangalehon gogo tu jolma on asal ma dihaposi Debata. Dihaporseai do nian na adong Debata, alai ndang adong panghorhon ni haporseaonna i tu hagogoon ni Debata di ngoluna. Napaopathon, i ma na manghaporseai na marhagogoon do Debata, jala tarbahen Debata na gogo na so marnaloja jala na so dung mandate i do hagogoon tu angka na manghaposi hadirion dohot hagogoon ni Debata Jahowa i. Angka na songon i haporseaonna, masa do di ngoluna hagogoon ni Debata nang pe sian hajolmaon ndang tarbahensa be margogo siala marragam sibonsiri, isara umur na lam matua, sipanganon dohot siinumon na hurang bergizi, siala ni halojaon ni pamatang, siala ni parungkilon panghilalaan dohot roha, nang siala ni angka na masa di humaliang ni jolma i.
Horong na paopathon i do pinatolhas ni Debata marhite panurirang Jesaya tu sada bangso naung maheu panghilalaanna ala tarbuang, na manghilala na so dipatupa Debata uhumNa tu nasida. Dipasahat Debata i tu nasida asa unang mabiar nasida, alai baliksa marhaposan tu Debata. Debata mandok: Molo dihaposi sasahalak Ibana, sasada Debata na marhagogoon i, tarbahen Debata do mangalehon gogo tu ibana, nang uju gale ibana: "Alai angka na marhaposan tu Jahowa maruli hagogoon mardapotdapot, gabe marhabong ni lali laho manaek. Marlojongi nasida ndang olo loja, mardalani nasida ndang olo mandate" (Ayat 31). Ndang sahali ibana maruli hagogoon i. Alai mardapotdapot.
Sada haporseaon na mansai bagas jala togu do haporseaon na songon i. Di ginjang ni haporseaon na somal do on. "Boi do tuat, saor, tarsagi hagogoon ni Debata tu na manghaposi Ibana."
I do na masa tu ngolu ni si Simson di tongatonga ni paraloonna maradophon angka parhuaso dohot hagogoon ni halak Filistim naung mangarahut ibana tu di holangholang ni tiang partunggul. Joujou ma ibana tu Jahowa ninna ma: "Ape Tuhan Jahowa! Sai ingot ma ahu, jala pargogoi ahu nanggo sahali on dope, ale Debata, asa hutubalhon sahalinari matangku na dua I tu halak Philistim... Laos digogo ma mangonjar, gabe runggang ma bagas I manipa angka induk I ro di luhut halak angka na di bagasanl gabe tumorop angka na mate binununa di hamamatena i sian angka na binununa tagan di ngoluna" (Panguhum 16: 18, 30b). Songon i do hata haporseaon ni apostel Paulus uju di bagasan hurungan di kota Rom ibana ala ni mamaritahon Kristus: Filippi 4: 13, "Saluhutna do tarpatupa ahu marhitehite Ibana na margaogihon ahu."
Nang uju marsahit ibana, dung tolu hali ibana mangido asa dipamalum Tuhanta ibana sian sahit na adong di pamatangna, manurathon tu ruas ni huria na di kota Korint, na marnida Silang ni Kristus i ndang be songon hagogoon ni Debata, alai halageon ni Debata: "Tuk do asi ni rohangKu di ho, ai di hagaleaon do sun timbul hagogoon" (2 Kor 12: 9). Patudos Epesus: 6: 1, "Dungkon ni i, gabe togu ma rohamuna di bagasan Tuhan i dohot di bagasan hagogoonNa na togu i.
I ma angka contoh ni hinasintong ni hata ni Debata na pinasahatNa tu halak Israel uju di bagasn hagaleonnasida: "Dais do hagogoon ni Debata tu angka na marhaposan tu Ibana."
Ra di pardalanan ni ngolu nang ulaon ni angka na marhaposan tu Debata di portibion, ndang holan di tongatonga ni bangsoNa songon na hinatindangkon ni angka panurat ni angka buku nang surat na di Bibelta i, alai dohot do di pardalanan ni ngolu ni manang ise na marhaposan tu Debata di tongatonga ni marsasahalak ndang marsasabangso di portibion sian sada sundut tu sundut na asing. Di tongatonga ni ngolunta marsadasada pe songon i do. Songon i do isarana na hupanghilalaan di bona ni taon 2005, dung mansai loja pamatangku siala ni na manghobasi na ringkot tu pangurupion tu angka korban ni Tsunami di Banda Aceh di ujung ni bulan Desember 2004 i. Uju i mansai gale hulilala. Loja situtu. Di sada ari uju i di jabu na huingani hami di Medan, masuk ma ahu tu kamar perpustakaanku. Disi ma martangiang ahu. Hupangido gogo tambahan sian Debata, asa boi huuduti ulaonku manarihon angka korban Tsunami. Dung hupaujung tangiangku, migor hupanghilalahon do gogo tambahan dilehon Debata tu ahu. Lam porsea ma ahu tu hagogoonNa i.
Di ngolumuna marsadasada pe angka ruas ni Huria Kristen Batak Protestan nunga dihaposi jala dipanghilalalhon hamu na songon i. Jalan dang holan sahali, alai mardapotdapot.
Adong do hutanda sahalak lulusan SMA na juara umum ibana di ujung ni parsikkolaanna. Ala songon i pistarna dipangasahon ibana ma hapistaranna laho mangalului ingangan kuliah na denggan. Ndang dipangasahon ibana Debata marhite tangiang. Talu ma antong. Alai dung di ujian na mangihut dipangido Ibana asi ni roha ni Debata mandongani ibana mandohoti ujian masuk, lulus ma ibana. Dipatau Debata ibana, mandongani hapistaranna. Alai boasa ma nuaeng hata ni Debata na songon i mamanghulingi hita ganup di partingkian on?
(a) Suraon do ala nunga lam moru panghaposianta di hagogoon ni Debata na so olo loja dohot na so olo mandate i, jala pargogoonNa do na manghaposi Ibana?
(b) Suraon do nunga gumodangan hita marsigantung tu angka sipanganon, siinumon, dohot angka vitamin na boi mamargogoihon hita, sian na marsigantung tu hagogoon ni Debata na buas palumehon hagogoon tu hita asal ma tahaposi hagogoonNa di portibion dohot di ngolunta on?
Ra ndang adong sian hita penduduk di portibion di partingkian Covid 19 on na mandok ndang susa ngoluna binahen ni Covid 19 on. Sude hita nunga satolop mandok na ingkon mar-5M hita mangadopi harararat ni penyebaran ni Virus on. Jala las rohanta nunga dibonai bangsonta manjalo suntikan Vaksin Covid 19. Alai, hamu angka dongan, so tung lupa hita manghaposi hagogoon ni Debata di partongtanganta mangandopi Covid 19 on, uju nunga sahat virus i tu hita, uju marubat, nang uju manjagai dirinta sian hasasahat ni Covid 19 i. Lam pos ma rohanta di hagogoonNa. Tahaposi ma i di ganup rumang ni perjuanganta di ngolunta ganup ari, mangalo na jat, patupa na denggan, termasuk ma di na tapatupa di HKBP di taon on ulaon Pahinsat Hatauon Marhobas (Pemberdayaan) laho patupa haubaon (transformasi ) ni ngolua na ulaon ni HKBP mamungka taon on, songon i nang paluahon Dana Pensiun HKBP sian hagogogotan mangadopi utang na balga. Amen.
Administrator 