Jamita Evangelium, 10 Nopember 2019, Minggu XXI Dung Trinitatis "Manjangkon Dohot Mangulahon Poda" (Poda 19: 20-29)

Administrator Administrator
Jamita Evangelium, 10 Nopember 2019, Minggu XXI Dung Trinitatis "Manjangkon Dohot Mangulahon Poda" (Poda 19: 20-29)
Ist
Pdt Dr Robinson Butarbutar
Oleh: Pdt Dr. Robinson Butarbutar

Sian Parsameanta, STT-HKBP di Pematangsiantar


Di tongatonga ni Hakristenon sian bonana sahat tu nuaeng, mansai ringkot do ulaon pamaritaan Barita Nauli. Barita nauli na dibaritahon angka parbarita nauli  mansai hibul do (Jaha: Komprehensif), ndang pejek (Jaha: Sempit), ndang holan taringot tu partondion na so adong honana tu ngolu siganup ari, alai ingkon dohot do tong na tung hona do tu hangoluan siganup ari ni jolma i; ndang holan taringot tu beha ngolu sogot dung mate jolma i jala songon dia ma asa sahat tusi, alai dohot do taringot tu ngolu nuaeng di portibion; ndang holan taringot tu surgo hasonangan na manontong pinarade ni Debata tu angka na pinaluaNa, alai dohot do taringot tu portibi na taingani nuaeng on, beha asa boi ngolunta dison digohi hadoharon, hadameon dohot hatigoran sama hita nang sama donganta na tinompana naasing; ndang holan patuduhon dalan beha asa denggan parsaoranta dohot Debata sambing, alai ingkon dohot do patuduhon dalan beha asa mardenggandenggan parsaoranta sama donganta jolma, beha asa boi denggan dipasiding angka parbolatbolaton na manghorhon tu hasusaan ni ngolu, jala beha asa molo tung adong pe parbolatbolaton boi dipaujung parbolatatbolaton i tu pardamean na tigor jala na pangoluhon sude; ndang holan tu angka sundut naumposo, alai dohot do tu angka sundut natumua; ndang holan tu angka parompuan, alai dohot do tu angka baoa; ndang holan tu angka pamarenta, alai dohot do tu angka na diparenta, dohot udutna; ndang na gabe patubu parmusuon di tongatonga ni jolma, alai ingkon na patubu pardamean, holong ni roha di tongatongag ni angka parsaoran ni hajolmaon.  I do ulaon pamaritaan barita nauli i di tongatonga ni Hakristenon.


Ala ni i do umbahen na jotjot di jamita evangelium di Parmingguon ni halak Kristen, ndang holan sian buku patik nang buku sejarah di Padan Narobi  na patorangkon beha bangso ni Debata mandalanhon patik i na dienet gabe jamita; ndang holan sian angka surat di Padan Naimbaru na patorangkon songon dia ma halak Kristen songon jolma naimbaru mangolu di portibion di tongatonga ni parsaoranta dohot angka donganta jolma na so sahaporseaon dohot hita na dienet gabe jamita; ndang holan sian angka buku panurirang na manjouhon hamubaon ni roha dohot pasahathon barita asi ni roha ni Debata tu pardosa dienet gabe jamita; ndang holan sian buku Evangelium Naopat i nang angka surat di Padan Naimbaru napatorangkon songon dia ma boi malua jolma i sian huaso ni dosa dohot sian hamatean na manongtong i, alai dohot do tong sian Buku Poda, na mangajarhon songon dia ma angka marhabiaran mida Debata i mandalanhon ngolungoluna di portibion asa boi denggan ngoluna, boi saut angka na denggan natinahi dohot na binahenna di ngoluon di dirina sandiri nang tu angka donganna jolma, asa boi mardohar, gok hademahon, dao sian mara ngoluna, baliksa gabe daionna ngolu na tarpasupasu, ndang ngolu na gok hasusaan.


Bagian na parpudi i do na naeng soarahonon ni jamita Evangelium di minggunta sadarion, minggu XXI Dung Trinitatis: "Beha ma hita halak Kristen Batak di partingkian ni parngoluon di sandok portibion na sai lam patujolohon parbinotoan teknologi laho mandungdung sintasinta ni hajolmaon di ngolu on, asa boi hita songon halak Kristen mangatur ngolunta on ndang holan mangasahon hapistaran dohot habisuhon ni hajolmaon, alai ingkon tapatujolo do habisuhon na ro sian hata ni Debata laho mandalanhon denggan ngolunta on, asa angka na martua hita. 


Mansai ringkot jamita evangelium sadarion mangondolhon hinaringkotta songon angka ruas ni Pamatang ni Kristus na pinorbadiaanNa i rade ndang holan manangihon  dohot manjangkon angka poda hangoluan na marojahan tu hatani Debata, alai ingkon dohot do sahat tu na mangulahon poda i. Tarlumobi  songon rakyat Indonesia niuluhon ni Presiden dohot Wakil Presiden Jokowi-Ma'ruf Amin  di taon 2019-2024 tongon marsitutu bangsonta patupahon Peningkatan Sumber Daya Manusia na tuk membangun infrastruktur dohot ekenomi na lam denggan marhite pendidikan dohot pelatihan-pelatihan asa tarbahen hita mamonai pandungdungon sintasinta gabe bangso na maju di taon 2045 i, mansai ringkot do hita ndang holan gabe sitangihon dohot sijangkon poda na hibul i, alai ingkon gabe siulahon poda i do, asa gabe angka na tarpasupasu hita, denggan  jala lam denggan be ngolu ni ruas ni HKBP di tongatonga ni bangsonta, gabe lam tau hita gabe pasupasu di portibion, di tongatonga ni ngolunta marsadasada, marsasaripe, marsasaparsaoran di tongatonga ni huria manang di dia pe hita dijou Debata mian dohot mangula, mambahen angka na denggan. Angka bangso na holan manangihon dohot manjangkon alai ndang rade mangulahon mian di bagasan hapogoson dohot hatartadingon do. Alai angka bangso nan dang holan manangihon, manjangkon alai sahat tu na mangulahon do na gabe angka bangso na maju.


Sahali nari, jamita evangelium tu hita sadarion mangidohon tu hita asa gabe angka ruas ni pamatang ni Kristus di tongatonga ni bangsonta na rade manangihon, manjangkon dohot mangulahon poda hangoluan na marojahan tu hata ni Debata. I do ondolan ni ayat  20 + 27 ni Poda 19 i. Na tarsurat dung ayat 20 (i ma ayat 21-26) jala ayat ayat 27 (i ma ayat 28-29) marisihon dia ma poda sibegeon, sijangkonon, dohot siulahononhon i. 


Molo tuk tingkinta, denggan do sahat jamita i tu dia ma isi ni poda i tangihononta songon jamita sadarion. Alai molo ndang tuk tingki, mansai denggan do molo talehon tingki na denggan laho manangkasi nunga songon dia hita halak Kristen Batak domu tu topik ni jamita on: "Gabe sitangihon, sijangkon dohot siulaon poda na marojahan tu hata ni Debata ma hita."


Boasa mansai ringkot on di partingkianta sinuaeng on? Suraon do ala hinorhon ni na nunga tung mura dapot hita angka parbinotoan marhite digitalisasi ni sude angka parbinotoan, nunga tubu nuaeng generasi sijogal roha, sijogal pingkiran, sibahenbahenna generasi na so olo be manangihon ajar dohot poda sian angka silehon ajar dohot poda di tongatonga ni huria, masyarakat nang bangsonta?  Jala molo tung adong pe na manangihon, alai ndang apala olo manjangkon poda dohot ajar be? Molo tung adong na mandok manjangkonsa, alai ndang apala olo mangulahonsa? Atik na siala ni i do umbahen maol situtu gabe bangso na maju hita, ai angka poda na denggan ndang apala diulahon bahatan rankyat Indonesia.  Sai tabege jala tajangkon do angka poda ni angka natuatua, angka poda ni angka pangajari di angka sikkola na marragam tirket i, poda na mandok sialoon do korupsi mamungka sian bagasta be, alai sai lam tubu angka korupsi di ragam ni pargulmiton ni ngolunta. Sai dipodahon do tu hita asa manjagahon angka na tinompa ni Debata na asing i, lingkungan hidupta, alai sai  torus do tasegai angka lingkungan hidupta. Dipodahon Tuhanta Jesus do asa tahaholongi donganta jolma, dohot nang na so manghaholongi hita, alai adong do tong, ia so bahat do, nang angka ruasta na gabe sipararat parmusuon di media sosial budaya, na gabe mampanghorhon lam tubu roha holan mamingkirhon houmna sandiri, kelompokna sandiri. Dipodahon Ibana do tu hita asa masihaholongan hita angka ruas ni pamatang ni Kristus i. Alai hita so tandi do I tarida sama hita. Baliksa bahat hita na patupa na so denggan tu donganna naporsea, apalagi tu donganna na so porsea. Hape taboto do tangkas molo martondi holan mamingkirhon dirina sandiri angka rakyat Indonesia di tingki mangadopi angka penjajah, ndang na adong hari Pahlawan; ndang na adong ari pengobanan ni angka anak-anak bangsa mangalo angka penjajah.  Di pardongan saripeon pe, bahat do tabege dohot tajangkon poda pardongan saripeon ni halak Kristen, isara na so jadi murukmuruk angka ama tu inantana, alai lam bahat do angka ina gabe holan na manghatahon lungun ni rohana tu angka donganna ala sai holan na muruk amantana tu nasida. Dna. 


Di Hakristenon, mansai tangkas do dipodahon hinaringkot ni ndang holan manangihon dohot manjangkon hata i, alai ingkon sahat do tu na mangulahon. Andar do i di buku Evangelium Mateus nang di surat Jakobus. Songon i ma koras ni hata ni Tuhanta Jesus tu angka na holan manjangkon alai ndang mangulahonsa. Songon on didok Tuhanta Jesus: "Ndada saluhut halak, na mandok Ahu Tuhanna bongot sogot tu harajaon banua ginjang i, holan angka na mangulahon lomo ni roha ni Damang na di banua ginjang i do" (Mat 7: 21). Diuduti Ibana ma songon on: "Asa na umbege hatangki jala diulahon, sipatudosan ma I tu halak na marroha, na paulihon bagasna di tas batu mamak. Ia ro pe udan potir, mangalantap pe tangkuju jala pur pe habahaba manondong bagas I, ndang na marumpak, ai batu mamak do haojahanna" (ayat 24-25).


Denggan do tasulingkiti rohanta dung tabege hat ani Tuhanta Jesus i. Molo ndang dope angka siulahon podaNa hita, muba ma hita. Molo nunga tabonai dohot tahasomalhon, tauduti ma.


Molo sanga tingkinta, denggan do taida dia ma poda di Poda 19: 21-26 dohot 28-29 i sitangihonon, sijangkonon dohot siulaonta di partingkian ni ngolunta nuaeng on? Adong  onom poda i. Dia ma i?


Naparjolo, di na patupa angka rencana-rencana ni ngolunta, manang taringot tu dia pe i, unang tapangasahon holan hatauon, hapistaran dohot habisuhonta sandiri, alai ingkon tapadohot ma Debata di angka sangkapta i, ala  holan sangkap ni Jahowa do na marsihohot, jala sai adong do na so tarbahen hita marnida hagaleon ni angka rencananta i (ayat 21). Ndang holan di bona ni angka rencananta i tapadohot Debata marhite angka tangiangta nang hasintongan ni hataNa, alai ingkon dohot do nang di na tapadalan sangkapta i. Jala ingkon dohot do tong di na manangkapi tu jolo muse dung angka evaluasi. I do imbarta angka namarTuhan sian na so marTuhan. I do imbarta angka na marhaposan tu Debata sian angka na so manghaposi Ibana.


Napaduahon, hinaringkot ni naporsea i jumpangan mar-habasaron  (Heber: khesed). Di hata Inggris diterjemahkan hata khesed dison songon loyalitas (ayat 22 Haposan ibana tu angka na pasahat ulaon dohot tanggung jawab tu ibana. Ndang baliksa, maniham sian pudi. Di tingkion, habasaron dohot lapatan haposan dohot loyal i do dilului angka silehon tanggung jawab dohot silehon ulaon tu angka parkarejo, ulaon na metmet sahat tu nab alga situtu, di ulaon dia pe i tahe. Unang uju disi silehon ulaon i asa diulahon ulaon i denggan. Bahat do angka investor ndang lomo rohana patupa usahana di sada huta molo angka pangula di huta i ndang marhabasaron di ulaonna, ndang haposan, ndang loyal. Tatangiangkon ma lam tubu angka hita na loyal.


Napatoluhon, biar mida Jahowa (ayt 23) ai sabam do roha ni i marsonangsonang, ai so manginona jea tu ibana. Ai angka na biar mida Jahowa ndang ulahonon ni i angka hajahaton nang uju ndang diida donganna jolma. Di angka negara na mansai maju situtu, ndang ingkon jolma be manjagai, alai angka alat-alat canggih nama marnida angka panangko. Alai nang pe disi sai boi dope ummalo angka sipatupa hajahaton.  Alai angka nasida ndang dung sonang ngolu ni, arian nang borngin, sai digohi biar do i, jala jonok-jonok do jea tusi. Alai ndang adong na buni di jolo ni Debata angka siula hajahaton. Jalan dang adong na malua boti sian uhumna angka siula hajahaton, di ngolu on nuaeng nang di ngolu sogot. Asa, ingkon angka ruas ni huria na marhabiaran mida Jahowa ma hita di ngolunta. 


Napaopathon, tapadao ma dirinta sian losok ni roha/gabe sigurbak ulu, angka sibonsiri na tontu di hapogosondo sigurbak ulu . Molo adong di tongatonganta angka sisongon i dohot angka pangalesi, unang disegai nasida angka nadenggan, baliksa asa muba nasida, ingkon koras do pangkeon dalan maminsangg nasida asa muba (ayat 24-25). Pola didok hata, "mangonai tangan" tu nasida. Di hata nuaeng ndang apala i be rumang ni hata sipangkeon tu angka nasida, alai tindakan na koras isara mansohot pasahat ulaon na marsintuhu tu nasida.  Ala ni i, tapadao ma hadirion sigurbak ulu sian tongatonganta angka ruas ni huria, manang di dia pe hita, manang aha pe ulaonta. Ingkon mangula do hita sadenggandengganna. Molo gurbak ulunta ala ndang malo hita mulaulaon, marsiajar ma hita. Sai ungkap do dalan ngolungolu molo marhadirion na ringgas hita jala marparbinotoan haringgasonta i. Gariada tahe lehonon ni angka dongan do tu hita angka ulaon molo halak na ringgas do hita. Amanta Presiden Jokowidodo di pidato na jempek pinatolhasna di tgl 20 Oktober 2019 i mandok na mangihut on ma sipatupaonta songon sada bangso asa sahat hita gabe bangso na maju di taon 2045: "Kerja keras, kerja cepat, kerja produktif, kerja marhaimbaruon dohot mencapai hasil." Ringkot do tapaodai dohot talatihi dirinta asa tau patupahon i asa boi hita gabe pasupasu di bangso na naeng gabe maju i.


Napalimahon, gabe angka na pasangap angka natorasta ma hita, unang angka na mangarupai amongta dohot palaolao inongta manang sadihari pe (ayat 26). Songon bangso na malua sian penjajahan Bolanda dohot Japang siala ni perjuangan ni pahlawan bangsa, unang marisuang tabahen angka perjuangannasida i marhite na so denggan membangun bangsonta bangso na merdeka on asa gabe bangso na bermartabat dohot berwibawa di jolo ni angka bangso na asing. Molo ndang tapatupa i, na mangarupai angka pahlawanta i do hita. 


Napaonomhon, unang ma gabe angka sitindangi parroha na jat hita, baliksa gabe angka sitindangi angka parroha na denggan dohot na tigor ma hita, ai tangkas do uhum tu angka na rap mangula dohot angka na jat (ayat 28-29).  Mansai ringkot do i di era digitalisasi on. Unang gabe tardapot hita ruas ni HKBP sitindangi parroha na jat. Alai sitindangi parroha na tigor ma.


Naonom poda i ma jolo tatangihon di bagasan minggu on, tarimangrimangi, tajangkon dohot taulahon: Padohot Debata di angka sangkap nang ulaonmu; gabe halak na marhabasaron/setia, loyal ma ho, marroha biar mida Debata ma ho nang dina so diida donganmu jolma,  unang losok alai ringgas ma mulaulaon, pasangap natorasmu unang rupai dohot palaholaho, jala gabe sitindangi halak natigor ma ho unang sitindangi halak na jahat di ngolum. Onomsa ingkon begeonta, jangkononta, dohot ulahononta, asa boi gabe denggan ngolunta jala pangkeon ni Debata hita ruas ni HKBP membangun Indonesia gabe negara na maju.(*)

Komentar
Berita Terkini